Coppa Italia Juventus leh Milan inhmachhawn dawn

Zanin dar 12:15-ah Juventus leh Milan ten Italian Cup nomawi an inchuh dawn a, champion lai Juventus tan awlsam taka nomawi chawi theih a ni dawn lo. Mahse, Turin khaw club hian an nomawi an humhim thei a nih chuan league-ah an lo champion tawh bawk avangin season hnih chhung a zawna Serie A leh Coppa Italia nomawi chawi thei hmasa ber an ni dawn tihna a ni a, Italian football-ah phek thar ziah kai ngei an tum ang.

Milan-in league-ah pasarihna nichungin season an khar a, Italian Cup-ah an champion zawh loh bawk chuan season thum chhung a zawnin European football-ah an hmel an lan dawn lo tihna a ni a, khawvela club ṭha ber pawl ni ṭhin tan hetiang record duhawm lo hi thlen tir chi a ni lo.

Tun season-ah team pahnih hi vawi hnih inhmachhawn tawhin Juventus-in hnehna an chang ve ve a, Milan hna a awlsam dawn lo. Milan full-back De Sciglio erawh a zam phah lo a, Juventus hneha nomawi an chawi theih ngei a beisei.

De Sciglio chuan, "Juventus hneh hi a theih a ni tih ka hria a, player-te kan thawh ho ṭhat a ngai dawn a ni. Italy-a champion lai ni mah se Juve hmachhawn dan chu kan hria. Zanina kan inkhelh hunah pawh hmun awl kan siamsak miah loh a pawimawh dawn a ni," tiin a zam lo.

Hetihlai hian Milan president Silvio Berlusconi chuan Italian Cup nomawi an chawi thei a nih chuan an season duhawm lo tak an thai bo theih a beisei thu sawiin, "Coppa Italia nomawi kan chawi a nih chuan kan season pawhin awmzia a nei dawn tihna a ni. Europe-a kan inlan ngei hi a ṭul a, kum 30 chhunga kan nomawi 29-na hi kan chawi theih ngei ka beisei," tiin beisei a nei sang hle.

Rossoneri hian hliam vangin defender pahnih Luca Antonelli leh Ignazio Abate an chhawr theih dawn leh dawn loh a chiang lo a, thla thum zet hliam vanga a chawlh hnuah forward M'Baye Niang a lo kir leh tawh thung.

Juventus-in hrem vangin centre-back Leonardo Bonucci an chhawr thei dawn bik lo a, chawn hliam vangin Sami Khedira chu squad-ah pawh telh a ni lo bawk.