Aizawl FC-in history kan siam ang - Das Zaninah Mohun Bagan Vs Aizawl FC
Aizawl FC hian Mizoramah Federation Cup nomawi an rawn hawn lo a nih pawhin MPL champion hian India ramah Mizo hming an ti ṭha tawh tih sawi nawn a ngai lo. Chutihrualin Kolkata club lian Mohun Bagan hneha nomawi an chawi a nih chuan a va ropui dawn si em!
Zanin dar 7:00 hian Aizawl FC leh Mohun Bagan ten Indira Gandhi Stadium, Guwahati-ah Federation Cup final khelh a ni dawn a, champion-in season tharah Asia khawlmualpui inelna sang ber dawttu AFC Cup an khel ang.
I League lamah
Aizawl FC-in India ram inelna sang bera an tum hmasak ber chu Mohun Bagan an ni. Barasat Stadium-ah January 6 khan MPL champion leh Mariners hi an inhmachhawn a, Kolkata club hian Cornell Glen-a goal hnih bakah Balwant Singh-a goal hmangin 3-1 in henhna an chang. Mizo club hian Bengali right back Pritam Kotal-a'n an lama a tih luh bak an ti lut lo a, Spanish manager Manuel Retamero hoa khel Aizawl FC inchhuanna chu ball an chang tam tih zawng a ni.
Mohun Bagan-in I League nomawi chawi nawn tumin India ram an thunun chho a, hneh loh an tawng lo. March 26, 2016-ah table mawngphaha awm Aizawl FC chu Rajiv Gandhi Stadium, Mualpuiah awlsam taka hneh an tum laiin an mualpho. Jahar Das-a hnuaia khel Aizawl FC-in Joel Sunday leh Lalchhawnkima goal hmangin Mariners 2-1 in an barakhaih a, Trinidadian stiker Glen-a'n Kolkata club tan goal khat a khung ve bawk.
Mariners hi Aizawlah hrem vangin head coach Sanjoy Sen-a'n a ho thei lo a, inkhel pahnihah hian an player pawimawh Sony Norde leh Jeje Lalpekhlua te an khel lo ve ve. Bagan hi Aizawl FC laka an mualpho hnuah an talbuai chho a, Bengaluru FC lakah an nomawi an chan. MPL champion pawhin India ram club ṭha ber hneh hnua awm dan an thiam lo a, hmun hima awm mai tur kha an hawi san luatah hnuh hniamin an awm a, season tawpah an relegate phah hial.
Bagan mual?
Final khelhna tur hi Guwahati ni mah se he mual hi Mohun Bagan-in AFC Cup an khelhna hmun a ni. Mariners hian Indira Gandhi Stadium-ah hian Maziya (5-2) leh Yangon United (3-2) in an hneh a, knockout stage an luh chian hnuah South China (0-3) an hneh lo.
Tun season-ah Mizo tlangval Jeje-a'n Guwahati-ah hian goal li a khung a, 2006 FIFA World Cup khel pha Cornell Glen leh Sony Norde ten goal hnih ve ve an khung bawk.
Rinkai Bagan?
Mohun Bagan coach hlui Jahar Das chuan, "Bagan hruaitute, hruaitu hlui leh player hlui thlengin Aizawl FC hi awlsam taka hneh theih turah an ngai. Club sulhnu leh an player-te thlirin an rin dan hi a mak lo," tiin Vanglaini palai a hrilh.
India ram football hrechiang tan chuan a vawi 19 nana Fed Cup final lut Mariners chak zawk tura an ring hi a mak lo a, Kolkata club hi vawi 13 an champion tawh a ni mai lo. Tun season-ah Bagan hian I League champion Bengaluru FC chu vawi hnih (2-0 & 5-0) an hneh a, Federation Cup final thleng tur hian match li lekah goal 12 lai an khung. Sanjoy Sen hoten Blues lakah nomawi chan mah se tun season-ah chuan team ṭha bera ngaih an ni tho tho.
Tu nge inlan ang?
MPL champion hian semifinal-a hnawhchhuah midfielder David Lalrinmuana an chhawr thei dawn lo a, captain thlakna tura rin R. Malsawmtluanga chu club dan zawm loh vangin Guwahati-ah hruai a ni lo.
Goalkeeper-ah Soram Porei bawk kan hmuh leh a rinawm a, MPL best keeper Lalawmpuia chu practice-naah a inhliam avangin Zothanmawia chuan nimin khan Guwahati a pan nghal.
Tlarhnungah Lalchhawnkima, Emma Chigozie, Lalramchullova leh Ricky Lallawmzuala te an awm hmel bawk. Bagan an hneh ṭuma Yusa Katsumi dah ṭhatu Lalruatthara erawh tlarhnungah hmun a chan hmel lo a, khelhna hmun a chang a nih chuan midfield-ah Yuta Kinowaki nen an inkawp ang.
Aizawl FC tlarhmaah Joel Sunday chu team innghahna tur a ni a, Nigerian striker hian Fed Cup-ah goal li a khung tawh a, Jeje-a phak lohna chu goal hnih chauh a ni. Chanmari FC striker hlui Joel thlawp tur hian Alfred Kemah Jaryan a awm ang.
MPL champion hian wing-ah Albert Zohmingmawia leh H. Lalmuankima te an chhawr a rinawm a, Brandon VL Remdika chhawr theih turin a awm bawk. Captain David thlakna tur hi hriatthiam a har a, Ruatthara a awm theih rualin AIFF Academy chhuak Lalramzauva a awm thei bawk.
Mizo club an ni tlat!
Sum hman zat aṭang chuan Bagan leh Aizawl FC hi khaikhin chin an ni lo a, amaherawhchu goal aṭanga teh tur a nih avangin Mizo club hi an buai lo.
Aizawl FC coach Jahar Das chuan, "Aizawl FC-in history kan siam ang. Federation Cup hi Mizo-rama rawn hawn ngei kan tum. Champion turin kan thawkrim a, team boruak a ṭha bawk. Mohun Bagan hi kan hneh tawh avangin kan zam lo a, kan zuam tihna erawh a ni lo. I League-a hneh loh la tawng lo Bagan hnehtu kan ni," tiin a club hlui laka a zam loh thu a sawi.
Final Kalkawng
AIZAWL FC
Quarterfinal
Aizawl FC 2 - 1 Bengaluru FC
AFC : Alfred Kemah Jaryan 38'; Joel Sunday 90'
BFC : Eugeneson Lyngdoh 15'
Bengaluru FC 2 - 3 Aizawl FC
BFC : CK Vineeth 28'; Sunil Chhetri 74'(P) AFC : Joel Sunday 26', 37'; David Lalrinmuana 49'
Result : Aizawl FC 5-3 in an chak
Semifinal
Aizawl FC 0 - 0 Sporting Goa
Sporting Goa 2 - 2 Aizawl FC
SCG : Sumit Passi 45+2'; Glan Martins 80'
AFC : Joel Sunday 37'; Lalchhawnkima 60' (P)
Result : Away Goal Rule hmangin Aizawl FC an chak
MOHUN BAGAN
Quarterfinal
Salgaocar 2 - 3 Mohun Bagan
SAL : Martin Scott 26'; Calvin Mbarga 30'
MMB : Jeje Lalpekhlua 1', 86'; Abhishek Das 77'
Mohun Bagan 4 - 0 Salgaocar
MMB : Yusa Katsumi 25'; Sony Norde 45+1', 52'; Jeje Lalpekhlua 90+4'
Result : Mohun Bagan 7-2 in an chak
Semifinal
Mohun Bagan 5 - 0 Shillong Lajong
MMB : Jeje Lalpekhlua 40', 51', 56'; Bikramjit Singh 45'; Azharuddin Mallick 86'
Shillong Lajong 0 - 0 Mohun Bagan
Result : Mohun Bagan 5-0 in an chak
Mumbai FC 0 - 1 Sporting Goa
SCG : Sumit Passi 90'
Sporting Goa 1 - 0 Mumbai FC
SCG : Subashish Bose 46'
Result : Sporting Goal 2-0 in an chak
Shillong Lajong 2 - 1 East Bengal
SLJ : Konsham Singh 33'; Fábio Pena 62'
KEB : Do Dong-hyun 44'
East Bengal 2 - 2 Shillong Lajong
KEB : Ranti Martins 23'; Lalrindika Ralte 37' SLJ : Fábio Pena 17'; Uilliams 114'
Result : Shillong Lajong 4-1 in an chak
Salgaocar 2 - 3 Mohun Bagan
SAL : Martin Scott 26'; Calvin Mbarga 30'
MMB : Jeje Lalpekhlua 1', 86'; Abhishek Das 77'
Mohun Baganc 4 - 0 Salgaocar
MMB : Yusa Katsumi 25'; Sony Norde 45+1', 52'; Jeje Lalpekhlua 90+4'
Result : Mohun Bagan 7-2 in an chak
Goal khung theite
Player Club Goal
Jeje Lalpekhlua Mohun Bagan 6
Joel Sunday Aizawl FC 4
Fábio Pena Shillong Lajong 2
Sony Norde Mohun Bagan 2
Sumit Passi Sporting Goa 2
Note : Goal khat aia khung tam