Copa Del Rey Final-ah La Liga champ Vs Europa League champ

Pathianni zan dar 1:00 hian Vicente Calderon, Madrid-ah Barcelona leh Sevilla ten Copa del Rey final an khel dawn.

Luis Enrique hoten kar liam ta khan La Liga nomawi an chawi a, Sevilla-in Nilaini zan khan Liverpool hnehin a zawna a vawi thum nan Europa League nomawi an chawi bawk. Spanish club-te khelmualah an ropuina an lang a, Copa del Rey final lut pha lo Real Madird leh Atletico Madrid te Champions League final-ah an inhmachhawn dawn.

Catalan club hian season liam ta khan Champions League nomawi an chawi a, tun season ṭantirhah Europa League champion Sevilla nen UEFA Super Cup-ah an inhmachhawn. Chak tura rin loh zawk Sevilla-in Ever Banega hmangin minute thumna lekah hma hruai mah se Lionel Messi-a'n freekick aṭangin goal hnih a khung a, Rafinha leh Luis Suarez ten goal khat ve ve khung lehin Barca chuan 4-1 in hma an hruai a, chak tura ngaih an ni. Amaherawhchu Sevilla-in Jose Antonio Reyes, Kevin Gameiro leh Yevhen Konoplyanka hmangin an sut.

Extra time khelh a ṭul a, minute 115-naa Pedro goal hmangin Barcelona an chak hram. Tun
ṭumah hian MSN vangin Barcelona chu chak zawk tura rinkai an ni nghal a, amaherawhchu Spanish manager Unai Emery hote hi en liam mai theih erawh an ni lo ang.