Jeje leh Bagan an inpeih

Mohun Bagan chuan nimin zing khan final atana an inpuahchahna hnuhnung Indira Gandhi Stadium-ah an nei a, Federation Cup final khel turin an inpeih tawh.

Mizo tlangval Jeje chuan, "Ruah a sur avang-in grass pawh AFC Cup kan khelh lai aiin a hring ṭha tawh zawk a, inkhelh a nuam tawh zawk bawk. Player-te kan dam kim vek a, coach-in a duh duh a thlang thei ang," tiin an inpeih tawh thu Vanglaini palai a hrilh.

Bagan forward-ah hian Jeje leh Cornell Glen chu awm tur chiang sa an ni a, wing-ah I League best player Sony Norde leh Yusa Katsumi te an la awm cheu bawk. Foreigner pathum man to rual zingah Mizo tlangval Jeje a duai lo a, goal aṭanga teh tur a nih chuan Jeje hi tlarhma mawina ber a ni.

Hnahthial tlangval Jeje chuan, "Aizawl FC hi I League-ah ka la hmachhawn lo a, team ṭha tak an ni. Champion turin theihtawp kan chhuah a, chak tura rin zawk pawh kan ni. Amaherawhchu football-ah chuan eng-pawh thleng thei a ni a, referee-in hun tawp ham rik a ham hma chu champion tur a la chiang lo," tiin an chak chian bik loh thu a sawi.