Federer-a'n French Open khel dawn lo

Grand Slam pali zinga Clay court-a an khelh ṭhin awmchhun French Open chu May 22 aṭanga June 5 hian khelh a ni leh dawn a, Roger Federer chu hnungzâng na vangin a inlan ve thei dawn lo.

2009 French Open champion tawh Federer hi kuminah hliam vangin a buai fo a, Australian Open hnuah a khup zai a ni tawh bakah a hnuzâng na vang hian Madrid Open pawh a khel thei lo tawh. Rome Open-ah khan lo kir leh mah se a la dam chiang lo tih a hriat theih a, third round-ah Dominic Thiem a hneh lo.

Kum 34-a upa Federer chuan, "Zawi zawiin hma chu ka sawn zel, mahse 100%-a ka inpeih loh avangin ka tan French Open khelh loh a ṭul. Thuthlukna siam harsa tak chu ni mah se tun season chhung mai pawh ni loin ka hmalam hun zawng zawng nghawng thei a nih avangin ka indim rih a ngai a ni," tiin a sawi.

Swiss thiampuipa Federer hian tun hnai Grand Slam match 65 zet chu a khel thei a, vawi 17 champion-in tennis chanchina player ropui berte zinga mi a ni.

Federer bakah hian 2008 French Open semifinalist Gael Monfils pawh a inlan thei dawn lo, world number 12 Monfils hi tun hnaiah season thum chhung chu he hmunah hian quarterfinal a lo lut ve tawh a ni.

World number 3 Federer a inhnuhdawh avang hian French Open vawi kaw champion tawh Rafael Nadal chu seeded palina a ni thei dawn a, Nadal hian semifinal hma chu Novak Djokovic emaw Andy Murray emaw a hmachhawn thei dawn lo tihna a ni.