Kroos-a'n a phu ang zahna a dawng

Real Madrid-in tun season La Liga match hnuhnung berah Real Betis nen goal awm loin an inhnehtawk. Los Blancos hi an champion tawh tho avangin inkhel a pawimawh tawh ber lo a, Santiago Bernabeu-a mipui pungkhawm pawhin an ngaih pawimawh chu Toni Kroos a ni.

Kum 34 mi Kroos hian Euro 2024 zawhah football khelh a chawlhsan tur thu a puang a, Betis nena an inkhel hi Real Madrid kawr haa Santiago Bernabeu-a a match hnuhnung ber a ni. Inkhelh ṭan hmain Real leh Betis player-ten Kroos hi guard of honour an pe a, captain armband nen German midfielder hi a rawn chhuak.

Carlo Ancelotti hoten inkhel thunun zawk mah se goal an khung thei lo a, 0-0 in an inhnehtawk. Minute 87-naah Toni Kroos an la chhuak a, mipuiin standing ovation an pe. Kroos hi Santiago Bernabeu-a a inkhelh hnuhnung berah man of the match-ah an thlang.

Kroos hian kum 2014 khan Bayern Munich aṭangin Real Madrid hi a pan a, euro maktaduai 25 man chauh a ni. Madrid-ah nomawi 22 a chawi a, La Liga leh UCL-ah vawi li ve ve a champion. Season tinin league match 30 bawr vel a khel ziah a, team ropui Real Madrid-ah meuh pawh midfield tichaktu a ni.

Inkhelh banah Kroos-a nomawi chawi 22 chu Bernabeu-ah nalh takin an rem a, club president Florentino Perez nen thla an la dun. Kroos hian a hming chuanna jersey chu President hnenah a hlan a, a lehkha zeh telah chuan, "Duh tak Presi tan, i chungah engkimah ka lawm e," tih a ziak.

Real boss Carlo Ancelotti chuan, "Player ropui ber zinga mi a ni a, midfielder ropui a ni a, theihna sang tak a nei a, a chapo lo a, a inngai tlawm em em a, team tana khelin mahni hma a sial ngai lo," tiin Kroos a fak hle.

Real Madrid legend Kroos chuan, "Sawi mai hi a harsa. Ka sawi theih chhun chu ka lawm e, tih hi a ni. Club leh a ṭantute, ka khelhpuite leh coaching staff te, helai hmun ka tan chuan ka in a ni. Kum 10 chhunga ka thil tawn hi theihnghilh theih a ni tawh lo," tiin a sawi.

Los Blancos hian June 1, Inrinni zan dar 12:30 hian Wembley Stadium-ah Borussia Dortmund nen final an khel dawn a, Real hi an chak a nih chuan a vawi 15 nan European champion an ni dawn. Kroos chuan, "Real chhuahsan theih dan ṭha ber chu nomawi nen a ni," tiin champion ngei a duh thu a sawi.