Leverkusen-in nomawi chawiin season an khar

Bayer Leverkusen-in Europa League final-a an mualpho hnuah an insiamṭha nghala, Inrinni zan khan Bayer 04 Leverkusen 1-0 a hnehin an champion.

Olympiastadion Berlin-ah Leverkusen tan Granit Xhaka-a'n goal awmchhun a khung. Chutihrualin Bundesliga champion hi minute 44-naah defender Odilon Kossounou hnawhchhuah a nih avangin hun tam zawk player 10-in an khel a, harsatna erawh an tawk chuang lo.

Xabi Alonso-a'n bul ṭantuah Atalanta hneh lohtu player panga ngawt a thlak a, Florian Wirtz leh Xhaka ten hmun pawimawh an la chang. Wirtz-a'n mual sir aṭangin ṭha takin a khalh lut a, goal-ah kawh zetin pet mah se keeper Julian Krahl-a'n a dang.

Leverkusen-in inkhel an thunun hret a, an goal khung dan erawh game ṭhat vang lam ni loin mimal thih ṭhat lam a ni. Wirtz ball chhuhsak tuma Kaiserslautern defender ball tih per chu box pawn aṭangin Xhaka-a'n kawh zetin goal kilah a pet lut. Goal mawi a ni a, a ropui tel bawk.

Leverkusen defender Kossounou a fimkhur lo, inkhelh ṭantirh lama yellow card a hmuh hnuah minute 44-naah Kaiserslautern defender a rah luih avangin yellow card vawi hnihna a hmu. Bundesliga 2 club-in an tamna an lantir nghal a, injury time-ah Daniel Hanslik-a'n a pet goal teuh hle.

Second half-ah goal mamawh Kaiserslautern-in tam zawk an ni tih an hria a, goal nawr kawngah an huaisen sawt. Substitute Ragnar Ache-a'n box pawn aṭangin kawh zetin a pet a, keeper Lukas Hradecky-a'n a dang ṭha.

Mahse, chance ṭha nei zawk chu Leverkusen an ni. Wirtz-a thiam vang vang liauin Jeremie Frimpong-a'n chance ṭha a nei a, goalkeeper bum mah se a rilru fim tawk loh avangin holam takin a chhuah. Kaiserslautern-in an tamna an hmang ṭangkai thei lo a, team ṭha zawk Leverkusen-in 1-0 in an hnehna an chang.

Leverkusen-in Bundesliga leh DFB Pokal nomawi an chawi a, Europa League final-ah Atalanta lakah chak lo mah se season ṭha bik tiin a sawi theih. Germany ram chhungah hneh loh an tawng loin double champion an ni.

Niko Kovac leh Hansi Flick ten player leh coach nichungin Bundesliga leh DFB Cup-ah an champion a, Alonso hi hetiang tithei pahtumna a ni.