Lalrina Renthlei a champion

Mizoram Snooker & Billiards Association (MSBA) buatsaih Mizoram State 9 Ball Pool Ranking 2024 - 2025 chu Inrinni zan khan khan zawh fel a ni a, Lalrina Renthlei, Tuikhuahtlang a champion.

Final-ah hian Lalrina Renthlei leh Lalsangzela, Khatla South te an inhmachhawn a, final match hi ‘Race to 9’ a khelh niin, an inhneh tawk hle. MSBA player ṭha pahnihin intawng an ni bawk a, an game a hmuhnawm hle. Frame an inlak chhawk zak zak hnuah Lalrina Renthlei hian 9 - 6 (frame 9 - frame 6) in hnehna a chang ta a ni.

Mizoram State 9 Ball Pool Ranking 2024 - 2025 champion leh runner up lawmman hian medal, certificate leh pawisa fai a keng tel a. Semifinalist pahnih K. Lallawmkima leh R. Lalṭhazuala te pawh lawmman pawisa fai hlan an ni.

Tournament hi May 20 aṭang khan MSBA Hall, Hawla Indoor Stadium, Republic Vengthlang-ah khelh a ni a, MSBA buatsaih inelnaah hian Mizoram hmun hrang hrang aṭangin player 40 chuang an tel a ni.