Vawi thum chak zawn Celtics

Boston Celtics chuan NBA Eastern Conference finals khelh laiah a zawnin vawi thum hnehna an chang, nimin zing khan an khingpui Indiana Pacers chu 114-111 in an hneh.

Best of seven series-ah Celtics hian 3-0 in hma an hruai, conference champion ni turin vawi khat chak chiah an hmabak tawh tihna a ni. May 28, Thawhlehni zing dar 5:30-ah game 4 an khel leh ang.

Gainbridge Field-house-a inkhelah Pacers hian hliam vangin guard Tyrese Haliburton an chhawr thei lo a, hun tawp hma minute ruk la awmah 84-66 in hma erawh an hruai thei tho.

Minute hnih chauh an hmabakah pawh 109-101 in hma an la hruai thei - mahse second khat lek pawh a pawimawh ṭhin, point hnuhnung 15 zinga 13 chu Boston lam chan a ni ta si, chak lo tur anga lang kha an chak leh ta daih.

An chak theih nan Jayson Tatum-a'n point 30 neiin a thawhhlawk lehpek hle a, rebound vawi 10 lain assist vawi riat a nei bawk - point 24 neitu Jaylen Brown a langsar leh hle bawk a ni.