Djokovic a hlauthawng

Novak Djokovic chuan season a hmang ṭha tawk lo tih a pawm a, tun kara inelna lian an khelh tur French Open atan pawh a hlauthawng tih a sawi - a dinhmun ṭha tawk lo erawh siamṭhat theih ngei a tum.

World number 1 a ni a, rinkai leh beisei awm pawh a ni - mahse tun season kal laiah Djokovic hian nomawi a la chawi miah lo, vawiin tlai hian French Open a match hmasa ber atan Pierre-Hugues Herbert a hmachhawn ang.

Kum 37 mi Djokovic chuan, "A nihna takah chuan ka hlauthawng ve tho mai, kumin chu ka khel ṭha tawk lo hle tih ka hria a, engtin nge ka siamṭhat ang tih pawh ka ngaihtuah nasa hle bawk a ni," a ti.

French Open inbuatsaih nan hian Geneva Open a khel a, kum dang ang lo takin clay court inelna lian inbuatsaih nan hian tournament lian pawh a khel duh lo, chutiang chung chuan a champion zo lo - semifinal-ah a chak lo.

Paris khawpuia inelna hi June thla tir lamah a zo dawn a, chumi hnuah grass court inelna an hmachhawn leh ang - Wimbledon a hnaih nghal mai avangin player tan chet ṭhat a pawimawh zual ṭhin a ni.