Pro Volleyball final khel tur Diakkawn

Ather Pro Volleyball League 2024 hmeichhe semifinal an khel zo, final khel turin Diakkawn an tlang. Kolasib club hian May 24, Zirtawpni zan khan an khingpui Serkawn chu 25-21, 17-25, 25-21, 25-23 (3-1) in an hneh.

LPS Arena, Falkland-a inkhelah Lalmuanpuii a langsar - Muani hian Serkawn innghahna Elisian Medai bitumin a ball vuak a dang fo a, Kolasib team tan point hmutu ber ni bawkin 21 a hlawh chhuah laiin point riat a hloh a, Kuriz Player of the Match lawmman a dawng.

Hmeichhe inelna huangah hian Luangmual chuan final an lo lut tawh bawk a, an champion nomawi humhim turin Diakkawn nen hian an inhmachhawn dawn. Tun PVL team ṭha leh hmuhnawm an nih avangin chak zawk tur rinthiam a harsa hle dawn a ni.

Zanin hian mipa semifinal hmasa zawk khelh a ni dawn, league round lama kal fal tak Hunthar chuan match tawp bera semifinal lut ve hram Chhinga Veng Spikers an hmachhawn dawn - Spikers tan a tir aṭanga fimkhur a ngai dawn hle a ni.

Tualchhung volleyball inelna lian hi LPS chuan live-in a pe chhuak ṭhin a, man chawiin YouTube-ah en theih a ni bawk; a hmuna kal thei tan ticket leiin a en theih bawk.