Lyon hnehin PSG an champion

Paris Saint Germain chuan Inrinni zan khan Lyon chu 2-1 a hnehin French Cup champion an ni a, an player ṭha bik Kylian Mbappe hoa an match hnuhnung berah nomawi an chawi tihna a ni.

Inrinni zan final inkhel hmuhnawmah Paris club hian Ousmane Dembele leh Fabian Ruiz te hmangin chawlhlawk hmain goal an khung a, an dinhmun an siamṭha viau - Lyon lamin Rayan Cherki hmangin goal khat sut ṭhen ve mah se goal dang a lut zui tawh lo.

Luis Enrique nauten an duh ber Champions League nomawi la lo mah se Ligue 1 leh French Cup nen season an khar a, kum bul ṭan nan Super Cup an la tawh bawk; Ligue 1 club dangin a tawn ang hi tawng ni se la chuan season ṭha bik a ni tho ang.

Hamrik hnuhnung a ri a, an champion tih a chian meuh chuan PSG player ten Mbappe an zawn a, match an khelh ho hnuhnung ber a nih avangin ngai leh ui tak chungin an thlah a ni.

France captain Mbappe hian kum 2017 khan AS Monaco aṭangin PSG hi a zawm a, inelna hrang hrangah match 308 a khelh aṭangin goal 256 a khuungsak a, club tana goal khung hnem ber dinhmun a luah.

Paris club tan hian kum sarih chhungin Ligue 1 nomawi paruk leh French Cup pali bakah League Cup vawi hnih a lakpui a, an duh leh tum tak UCL title la tur erawh chuan club dang jersey ha chunga a beih a ngai dawn a ni.

Mbappe hi kum 25 mi chauh a la ni a, nomawi hrang hrang a chawi hnem tawh. Real Madrid zawm ngei tura ngaih a ni a, hei vang hian coach Enrique pawhin tun season tawp lamah kha chuan a tel loa khelh dan tur a ruahman ṭan der tawh.

PSG coach Enrique chuan, "Final boruak hi chu a danglam a, chutiang karah chuan a tir aṭanga kan khelh dan khan min ti lawm hle. Kan hlawhtlinna chan hi player-te vang a ni tih ka chiang, kan hlawhchhuah erawh fans tan ka hlan thung.

"Ka naute an nghet ṭha em em a, tun anga game nghet leh ṭha kha he hmun ka lo kal tirh aṭanga ka suangtuah chu a ni, tunah chuan kum thar kan hman huna kan khelh dan tur phung pawh a lang, kumin aiin kan ṭha zual ngei ang," a ti.

Spanish manager hian Ligue 1 match hnuhnung pasarihah Mbappe hi vawi hnih chiah inkhel bul a ṭantir a, inelna dang UCL leh French Cup lamah erawh a chhawr thung a, a tel loa khelh dan a zir tih a chiang.

PSG tana a contract hmang zotu Mbappe chuan, "Tun hnai kum thum chhunga a vawi khat nan French Cup kan la leh chiah a ni a, he inelna hi kan tan chuan a hlu takzet a ni, ka tan chuan hun chhinchhiah tlak a ni bawk.

"Lung lenna tur tam tak ka nei, match khelh hmabak nei tawh lo leh hlen chhuak han nih meuh chuan a lunglenthlak duh khawp mai. He hmunah hian thil tam tak ka zir chhuak a, rawlthar mai kha puitlinga ka inchherna hmun a ni.

"Fans lam nen kan inpawh ṭhain hna thawktute nen pawh kan inzawm ṭha hle a, hei chuan Paris hi ka dam chhungin ka hre reng tawh ang," a ti a, a hun tawpa nomawi an chawi chu atan duhthusam a nih thu a sawi bawk