Giroud-a'n international football chawlhsan dawn

27th May, 2024

France international striker Olivier Giroud chuan Euro 2024 zawh rualin, ram tana inkhelh a chawlhsan tur thu a puang a, kum 37 mi striker chuan, "Les Bleus kawr ha chunga inelna ka hmachhawn hnuhnung ber tur a ni tawh dawn a, ka ngai khawp ang," a ti.

AC Milan striker hi France tana goal khung hnem ber a ni mek a, ram tan match 131-ah goal 57 khungin, World Cup 2018-ah khan a champion pui bawk - a sulhnu hi a nep lo hle.

Giroud chuan, "Naupang zawkte tan kawng kan hawn ve a ṭul a, season khata inkhel tam lutuk lo tura inbuatsaih a ngai bawk a, thil hi a tawk chauh a awm ve a ni," a ti a, inkhelh tam a tlin tawh lo.

World Cup 2018-a France an champion khan Giroud hian minute 465 zet khelmualah hun hmang mah se, goal a khung lo. Mahse, World Cup 2022-ah erawh goal li a khung a, quarterfinal-a England an hneh nan goal pawimawh a khung bawk.

France hi final a hruai thleng a, mahse, Lionel Messi hoa inlan Argentina chu penalty-ah an ngam lo. Giroud hian Euro 2016-ah khan ram ai a lo awh tawh bawk a, hetah pawh final lut mah se, nomawi an chawi lo. UEFA Nations League 2020-21 season-ah khan a champion pui thung.

Ligue 2 club Grenoble aṭanga a professional zinkawng zawh ṭantu Giroud hian French third division club Istres tan pawh khel tawhin, Ligue 2-ah Tours tan a khelh leh hnuin, 2010 khan Ligue 1 club Montpellier a zawm a, heta ṭang hian a hming a chher.

Arsenal, Chelsea leh AC Milan tan a khel leh a, player thawm nei na tak ni lo mah se, team tana khel ṭhin a nihna avangin ngainat a hlawh a, goal a khung thei viau bawk. Tunah pawh kum 37 ni tawh mah se AC Milan tun season-ah match 47 khelin goal 17 a khung tawh - Inrinni zan khan Milan tana a leage match hnuhnung ber khelin Salernitana nen 3-3 in an inhnehtawk a, goal a khung leh hram.

Giroud hian San Siro-ah a contract a hmang zo tawh dawn a, a hahdam ve theih deuhna tur lam hawiin Major League Soccer club Los Angeles FC chu Euro 2024 zawhah a zawm ang. American club-ah hian thla 18 cham turin contract a ziak a, a ṭul dan a zirin kum khat dang a pawhsei theih ang.