Ajax coach thar Farioli

Season hman zawh taka beisei phak lo Ajax-in intuaithar an tum a, coach atan Francesco Farioli an lakluh thu an puang - kum thum daih contract an ziahpui.

Kum 35 mi Farioli hi Nice coach a ni a, Ajax chuan French club nen hian Farioli la lut tura inremna an neih thu an puang a, Italian coach valai tak hian June 11 aṭangin a hna a ṭan ang.

Farioli hian Turkish club Fatih Karagumruk leh Alanyaspor te a lo enkawl tawh a, June 2023 khan Nice hi zawmin, season hman zawh takah khan Ligue 1-ah pangana a nihpui.

Ajax pawh hian season hman zawh takah khan pangana ni chungin season an khar a, Dutch club lar tan season ṭha lo tak a ni. Coach lailawk John van't Schip chu Farioli hian a thlak dawn a, a hnathawh dan tur hriat a châkawm hle.

Farioli chuan, "He club nihphung hi neih let leh kan duh a, thathona thar nen, hmathlir êng tak nei chungin theihtawp kan chhuah dawn a ni," a ti.

Italian coach chuan sawi zawmin, "Hnathawh tur tam tak a awm ang tih ka ring a, mahse, chutiang hna thawk tur chuan kan inbuatsaih mek tawh. A awmna dik taka Ajax hruai kir leh tur hian hun khawhral kan duh lo," a ti a, a ṭawngkam aṭang chuan a thlamuanthlak hle.