Lookman-a man a to lo

Europa League final-a hattrick siamtu Ademola Lookman chu Premier League club engemaw zatin an thlithlai niin British media-te chuan an tarlang a, Nigerian forward hi an duh tak tak a nih chuan man to lutuk loin an la lut thei dawn.

Khawthlang media-te tarlan dan chuan Lookman hi pound maktaduai 30 velin a leichhuah theih dawn a, tunlai player man zat aṭanga teh chuan Lookman a man hi a to hran lo.

Kum 26 mi Lookman hian tun season inelna hrang hrangah match 43 khela goal 15 khungin, assist vawi riat a nei a, Atalanta-in season duhawm tak an hman theih nana player langsar zinga mi a ni.

England-a piang leh seilian Lookman hi English football-ah a mikhual lo. Charlton Athletic aṭanga a professional zinkawng zawh ṭanin, Everton, Fulham leh Leicester City tan pawh a lo khel tawh a, age level-ah England tan a inlan ṭhin bawk.

August 2022 khan Lookman hian RB Leipzig aṭangin Atalanta hi pound maktaduai sarihin a pan a, £30mtd-in hralh pawh ni se, Italian club tan hlawkna hlang a ni tawh dawn - season hmasa khan match 33-ah goal 15 a khung tawh.