Pioli-a'n AC Milan a chhuahsan dawn

AC Milan manager Stefano Pioli chuan kum 2025 thleng San Siro-a cham turin contract nei mah se, Italian club hi a chhuahsan dawn a, club nen inhriatthiam tawnnain an inṭhen dawn a ni.

Milan hian Inrinni zan khan Serie A match-ah Salernitana chu hmachhawnin, 3-3 in an inhnehtawk a, hei hi Pioli-a'n Milan a enkawl hnuhnung ber a ni nghal - San Siro-a inkhelah hian fan-te chuan Pioli hi ui tak chungin an thlah.

Pioli kaihhruaina hnuaiah AC Milan hian kum 2022 khan Serie A nomawi an chawi a, kum 11 hnua Italian top flight league-a an champion leh hmasak ber niin, Pioli hnathawh hi a ropui hle.

Mahse, an champion hnu season-ah Milan-in beisei an phak lo a, table-ah palina niin season an khar hram. Mahse, Champions League semifinal an luh avangin a chungah Milan board-in rinna erawh an nghat chhunzawm.

Milan hian tun season-ah pahnihna ni chungin season an khar a, mahse, champion Inter Milan nen an inthlauhna a tam deuh avangin AC Milan hruaitu lamin inthlak danglam a ṭulin an hria.

Italian club lar Milan chuan thuchhuah siamin, "Pioli chungah kan lawm takzet a, European football-a team langsar pawl ni turin min dinthar leh a ni," an ti a, an coach hnathawh an theihnghilh lo.

Kum 58 mi Pioli hi Italian football-ah a mikhual lo hle. AC Milan a enkawl hma hian Italian club 13 zet a enkawl hman a, a Parma, Bologna, Lazio, Inter Milan leh Fiorentina te pawh a lo enkawl tawh ṭhin - nomawi a chawina hmasa ber erawh AC Milan a ni!