Blasters-in coach thar an nei

Indian Super League club Kerala Blasters FC chuan coach Ivan Vukomanovic nen an inṭhen hnuin coach thar an la lut zui a, Swede coach Mikael Stahre an lakluh thu an puang. Kum hnih chhung atan contract an ziahpui a, kum khatah cheng nuai 300 vel a hlawh ang.

Kum 48 mi Stahre hi a kum la nau mah se, coaching lamah a mikhual lo hle. AIK (Sweden), Panionios (Greece), IFK Goteborg (Sweden), Dalian Yifang (China), BK Häcken (Sweden), San Jose Earthquakes (USA), Sarpsborg 08 (Norway) leh Uthai Thani (Thailand) te a lo enkawl tawh a, Swedish top flight league aṭanga Major League Soccer thlenga tawnhriat lo nei tawh a nihna hi South Indian club tan a hlu ang.

Stahre hian a coaching career-a a tawnsan lai bera chhal ngam chu kum 2009 khan a tawk a, Swede club AIK chu an ram league leh cup-ah champion nomawi a chawipui a, kum 2010-ah Supercupen a chawipui zui bawk.

Chinese Super League-ah pawh hun lo hmang tawh Stahre chuan, "Club thuneitute nen inbiakna duhawm tak neih hnua he club ka zawm thei tur hi ka lawm hle. Asia-a ka zinkawng ka chhunzawm zel thei tur hi ka lawm a, he khawmualpuia ram pathum ka luhna tur a ni ta. India lo thlen a, intawn hlan ka nghakhlel tawh hle - hna ropui tak i thawk ho ang aw, go blasters!" tiin ISL club a zawm thar chungchang a sawi.

Blasters hi season thar atan an inpuahchah ngawrh hle. Coach thar an lakluh hma hian an player pawimawh, Uruguayan midfielder Adrian Luna chu kum thum dang khel turin contract thar an ziahpui tawh.

Espanyol tan pawha lo khel tawh Luna hi ISL-a player hlawh hnem bera sawi a ni a, season khatah nuai 700 vel a hlawh niin an sawi. ISL-ah season thum a khel tawh a, league match 53-ah goal 13 khungin, assist vawi 17 a nei tawh a ni.