IPL-ah Kolkata Knight Riders an champion
2024 Indian Premier League final chu Pathianni zan khan M. A. Chidambaram Stadium, Chennai-ah khelh a ni a, team ṭha ber Kolkata Knight Riders an champion. KKR hian Sunrisers Hyderabad chu wicket riatin an sawp.
Kumin IPL hi hmuhnawm viau mah se final erawhin beisei a pha lo hle. Sunrisers-in 113 runs chauh an siam a, KKR-in champion turin over 10.3 lekah 114/2 runs siamin hnehna an chang.
Thutlukna fuh lo
Tun ṭum final-a inhmachhawnte hi league round-a pakhatna leh pahnihna an nih avangin qualifier 1-ah an inhmachhawn tawh. Narendra Modi Stadium, Ahmedabad-ah KKR hian wicket riat thoin an hneh a, hemi ṭum hian Sunrisers-in bat hmasak an thlang.
Final-ah pawh Sunrisers bawk ṭhumvawrah an vannei a, Pat Cummins-a'n vawm hmasak a thlang. Cummins-a thutlukna a fuh tawk lo. Chutihrualin league round-ah an inhmachhawn ṭumin Sunrisers-in vawm hmasak an thlang a, an chak chuang lo, tih hriat tel erawh a ṭha.
Starc-a show
Kumin IPL player auction a nih khan Sunrisers-in nuai 2,050 zetin Cummins an lei a, mahse darkar hnih pawh tling loah KKR-in nuai 2475-in Australian fast bowler Mitchell Starc la lutin player man to ber record thar an siam.
Team pahnih sum senna player-te an che ṭha ve ve a, a tawpah a man to zawk Starc a langsar ta zawk. Ball thar vawm thiam Starc hian over khatnaah Abhishek Sharma chu pavillion lamah a thawnkir a, over nganaah Rahul Tripathi a vawm out leh bawk.
Starc bakah hian KKR bowler Andre Russel (19/3), Harshit Rana (24/2), Vaibhav Arora (24/1), Sunil Narine (16/1) leh Varun Chakarvarthy (9/1) te an che ṭha a, Sunrisers-in over 18.3 bak an daih lo a, 113 runs chauh an siam bawk.
A awlsam
KKR bowler-ten a harsa zawng zawng an thawk zo a, an bat hma hauhin chak tur a chiang tawh. Rahmanullah Gurbaz (39) leh Venkatesh Iyer (52*) ten tha an thlah chuang lo a, over 10.3 lekah target hi an umpha.
Kolkata Knight Riders hian season ṭha bik an hmang a, tun ṭum inelnaah hian vawi thum chauh an chak lo. Chutihrualin ruahsur vanga result awm lohna inkhel pahnih a awm.
Shreyas Iyer captain-na hnuaia khel KKR-in an champion an phu a, a vawi thum nan nomawi an chawi. KKR hi kum 2012 leh 2014 khan an champion tawh a, kum 10 hnuah nomawi an chawi leh chauh a ni.
Eng nge an sawi?
Season tluana kan khelh dan hi sawisel bo a ni. Kan thil tih hi thuin ka sawifiah thiam lo, match khatna aṭang khan khel ṭha em em a ni. A hunah tak player tin an rawn che ṭha zel. Player malin tun dinhmun hi min hruai thleng lo a, kan vai thawhrah a ni.
- Shreyas Iyer, KKR captain
An vawm ṭha takzet a, vanduai thlak takin ka ṭhianpa Starcy (Mitchell Starc) a rawn che ṭha leh a ni. Kawng engkimah an chungnung ta zawk. Chutihrualin tun season chhunga kan chet dan thlir chuan a lungawi thlak ka ti a, ka naute an huaisen. Hyderabad-ah min ṭantute tan lawmna tur ṭhahnem tak kan hnutchhiah.
- Pat Cummins, Sunrisers captain
KKR tan zan duhawm bik a ni. Final duhthusam a ni a, season ṭha bik a ni. League round-a che ṭha pahnih final-ah kan inkhelah ka ngai. Team angin kan che ṭha ka ti. IPL ka khelhna a rei tawh a, tawnhriat pawh ka nei ṭha. Over hmasa ber ka vawmna kawngah pawh ka tawnhriat hian nasa takin min pui a ni.
- Mitchell Starc, KKR (Player of the match)
