Premier League khel tur Southampton
Season thara Premier League khel tur club pathum a hriat kim ta - Pathianni zan khan Championship playoff final-ah Southampton chuan 1-0 in Leeds United an hneh a, season tharah English football-a club inelna sang ber an khel dawn.
Saints tan Adam Armstrong chuan inkhela goal awmchhun a khung a, Leeds-in a chhanletna tur an neih loh avangin Southampton an tling a, champion Leicester City leh Ipswich Town hnung zuiin season tharah English top flight league an khel dawn.
Season hmasa khan Premier League aṭangin Leicester City, Leeds leh Southampton te an tla a, Foxes leh Saints an kir lehnghal laiin, Leeds erawh season khat tal chu Championship lamah an khel leh phawt dawn tihna a ni.
Kha le Saints
Saints hian minute 24-naah goal hmahruai an khung a, Will Smallbone-a siamsak chu season duhawm hmangtu Adam Armstrong chuan a khung - tun season-ah goal 24 khungin, assist vawi 13 a nei tawh!
Leeds tan Dan James chuan vawi hnih ngawt goal khungna remchang a nei a, mahse, crossbar a tihper bakah Saints keeper Alex McCarthy-a'n a dansakte chu pui tak a ni - Leeds tan hian Crysencio Summerville chuan chance duhawm a hlah bawk.
Hetihlai hian Samuel Edozie chuan Saints tan chance duhawm a nei ve bawk a, mahse, a chhawr bik lo. Hun tawp thlengin goal dang a lut tawh lo a, Saints-in 1-0 a hnehna changin Premier League an khel dawn.
Saints an hausa
Championship playoff final hi khawvel infiamnaa sum tamna ber tiin an sawi ṭhin. Saints pawh hian hnehna an chan avangin pound maktaduai 140 talin an hausak belh dawn a, season khatah erawh an dawng nghal vek lo ang.
Season thum chhungin £140mtd hi an dawng ang a, an relegate lo a, Premier League-ah an inhamtang zui a nih phei chuan an sum dawn hi £305mtd vel a tling daih dawn - matchday ticket, broadcast leh sumdawnna lam aṭangin sum hmuh tur nasa takin a pung dawn.
Hei vang hian Premier League khelh phak a hlu a, an inhamtan hram hian pound maktaduai 100 tel an hlawh nghal tihna a ni. Premier League chuan ruahmanna felfai tak neiin, sum hi club 20 hnenah a sem ṭhin a ni.
Fak phu Martin
Saints coach Russell Martin hian season ṭan dawn khan Southampton hi a enkawl ṭan a, MK Dons leh Swansea City a enkawl laiin football hmuhnawm pholang ṭhin mah se, playoff a khelhpui phak ngai lo a, fan-ten beiseina neih san an harsat.
Captain James Ward-Prowse-a'n match khat hnuah a chhuahsan a, September-ah match li zet a zawnin an tlawm zui a, Sunderland-in 5-0 a an sawp hnuah Leicester City-in 4-1 in an sawp leh nghal a, Martin hi ban mai theih dinhmunah a ding hman hial.
Mahse, match li a zawna an chak loh hnuah 3-1 a Leeds hnehin an insiamṭha a, match 25 chhung tlawm an nei lo zui. Automatic promotion hial an besiei hman a, mahse, season tawp hnaihah a zawna vawi thum tlawmin, an chance an khawhral a, playoff hmang erawhin an inpetkai leh ta tho.
Leeds an na
Championship-a vawi hnih ngawt Norwich City champion pui tawhtu Daniel Farke hoin Leeds-in season an hmang a, an che ṭha hle. Mahse, table-ah pathumna niin, season an khar a, automatic promotion an phak lo chiah - point 90 an hmu.
Leeds hi Sunderland (1997-98) hnua point 90 hmu chunga automatic-a Premier League inpetkai thei lo hmasa ber an ni a, mak ve deuh chu Black Cats pawh khan point 90 an hmuh season-ah khan playoff final-ah an tlawm ve tho!
Leeds-in season khat tal chu Championship-ah hun an hmang leh phawt dawn a, nikum July-a club leitu 49ers Enterprises puihnain English top flight league kir tumin an bei leh dawn - tun atan erawh Championship player of the season Summerville, rawlthar duhawm Archie Gray leh French forward Georginio Rutter te chelh phawt chu hna hmasa tur a ni ang.