A tawpah Xavi a chak

Xavi-a'n Barcelona coach aṭanga ban a nih thu hre chungin, tun season-a a tawp nan Barca a kaihruai a, Sevilla lakah 2-1 in an chak. Catalan club tan Robert Lewandowski leh Fermín López ten goal khat ve ve an khung a, Sevilla tana Youssef En-Nesyri goal khungin awmzia a nei phak lo.

Kum 44 mi Xavi-a'n chak result nen Barca a mangṭha a, mahse, a lawm lo.Xavi hian player a nih laiin Barca tan La Liga nomawi vawi riat ngawt a chawi a, Champions League-ah pawh vawi li a champion.

Mahse, club coach ni tura an thlem luh hnuah a phu ang tawk zahna a dawng loah a ngai. Spanish coach hian Barca hi tun season-ah nomawi chawipui lo mah se, season hmasa khan La Liga leh Spanish Super Cup-ah champion nomawi a chawipui.

Xavi chuan, "He club ka zawm tirha buaina kha ngaihtuah ila, kan hnathawh hian a phu angin ngaihhlut a hlawh tawk lo a ni. He club ka rawn zawm khan league-ah pakuana kan ni a, a hnuah nomawi pahnih kan chawi.

"Tun season-ah erawh beisei kan phak lo tih ka pawm a, match ṭhenkhatah tihsual hotê kan neih vang a ni," a ti a, amah thlaktu tur tana thu hriat nuam lo sawi zuiin, "Min thlaktu tur coach chuan Barca hian harsatna leh buaina an nei tih a hriat a ṭul a, he hmuna awm hi a awlsam lo.

"Sum leh paiah buaina a awm bawk a, engmah a awlsam lo ang," a ti. Barca-ah hian Bayern Munich boss hlui Hansi Flick chuan Xavi hi a thlak dawn niin khawthlang media-te chuan an tarlang.

Xavi hian January khan Barca a chhuahsan tur thu a sawi a, mahse, club president Joan Laporta-a'n cham tura a ngen avangin April khan cham turin thutlukna a siam - tunah an ban leh si! Xavi tan lungawi a harsa ang tih a chiang.