TNT fiahin an awm dawn

Ather Pro Volleyball League 2024 semifinal hnuhnung zawk chu zanin dar 8:00 hian LPS Arena, Falkland Park-ah khelh a ni dawn - champion lai Thutak Nunpuitu Team (TNT) leh Tuichangral an inhmachhawn ang.

Tualchhung volleyball inelna lianah hian team hrang hrang an lo champion tawh ṭhin a, a hnua zuih ta mai an awm fo. TNT pawh hian league round bikah chuan beisei an phak lo, pathumna ni chungin semifinal hi an lut a ni.

April thla tawp khan team pahnih hi an intawng tawh a, inkhel hmunnawm leh inhnehtawk takah TNT hi 25-22, 17-25, 25-23, 19-25, 16-14 (3-2) in an chak, zaninah pawh inrintawkna an neih theih phah ang.

An intum hmasaka Kuriz Player of the Match atana thlan Zosangzuala hi tun PVL khelh laia player hmuhnawm zinga mi a ni a, ani leh Vanlalṭanchhana te an inthlawp fuh a nih chuan a kum zawna final khel turin theihna an nei.

Season dang ang bawkin a hmun leh pawn lam aṭangin TNT hian ṭantu an nei ṭha ṭhin, zaninah chak an duh a nih chuan a hmunah thlawptu an neih ṭhat leh a pawimawh dawn - Arena chhung boruak a nung khawp ang.

Pahnihna ni chunga league round khar thei Tuichangral hi dah hniam theih an ni lo. Tawnhriat nei ṭha Lalbiakmuana khelhna a ni a, an tha ti chak turin Mizoram pawn aṭangin Sonu-a an chahlut, mimala point nei tam fal tak awm ṭhin lo mah se team thawhhona ṭha chu an innghahna a ni ṭhin.