Cyclone KKR
Indian Premier League ṭum 17-na, TATA IPL 2024 chu thla hnih chuang hret khawvelin hmuhnawm thlira a thlir hnuah, an ṭum thumna atan Bollywood lalpa Shah Rukh Khan-a naute Kolkata Knight Riders chu champion an lo ni leh ta.
A ṭha ber champion
IPL tum 17 zet kan lo neih takah hian, League stage-a point hmu hnem ber team te hi, an champion zui kher lo. Tun ṭum hi league round-a pakhatna an champion ṭum rukna chauh a ni.
IPL hmasa berah Rajasthan-in bul an ṭan a, Mumbai Indians-in kum 2017, 2019 leh 2020 te khan league round-a pakhatna an nih hnuah nomawi an chawi. Kum 2022 khan Gujarat Titans-in league round aṭanga a tawp thlengin inelna an thunun a, kuminah KKR hun a rawn thleng leh chiah bawk.
League vs playoffs
Infiamna khawvela inhnialna tawp thei lo chu, team ṭha ber zawn nan hian leauge nge knockout system hi tehfung ṭha zawk tih a ni. Football league hrang hrangah hi chuan kumtluana league khelh a nih hnuah, a tawpah point khawl hnem ber hi champion-a puan an ni mai.
Rilruah English Premier League a lang nghal mai awm e. Chutihrual chuan American ho sports league-in an uar deuh chu, league khelh zawhah, champion zawn nan, a team points khawl hnem hoin knockout an khelh tir leh hi a ni.
Knockout-ah hi chuan vanneih leh vanduai niten kawngro a su a, team ṭha ber tehfungah a ṭha ber lo ti hi mi ṭhahnem tak an awm bawk. Engpawhnise, Premier League leh American Professional Sports League aṭanga a duangtute Hybrid IPL-ah hian league-a point hmu hnem ber Kolkata Knight Riders chu playoff lamah pawh a champion an ni zui a. Team ṭha ber an champion ti mai ang aw!
The finale
Chennai khaw lum karah, Pathianni zan thimhlim, Bay of Bengal tuipui kam maia ding, Chepauk Stadium-ah chuan thli a rawn thaw lut heuh heuh a. Nikum ICC World Cup final-a ṭhum vawra chak hnua, thutlukna siam dik Australia kaptan Pat Cummins-a'n Sunrisers Hyderabad tan erawh thutlukna a siam sual tlat.
Cummins hian vawm hmasak a thlan an rin ṭhup laiin vuak hmasak a thlang a, qualifier 2-a Sunrisers-in KKR an hneh loh pawh khan vuak hmasak hi a thlang tawh. Australian cricketer Cummins hian thutlukna a siam sualah a ngaih theih.
Swing & Seam
Chepauk Stadium-a thim hlima ṭhenawm lawk tuifinriat boruak inthlak lai thli rawn thaw chu ball thar laia, darkar khata 140 km chuanga vawm kawh thei Mitchell Starc, Vaibhav Arora leh Harsgit Rana te inkawp tan chuan 'Advance Krismas' hi a ni ringawt.
Balhla ang maiin ball an vawm swing a, Hyderabad innghahna Abhishek Sharma thihna ball kha, ball of the tournament kan tithei hial ang. Hyderabad batting line up te a khat tawkin dressing room lam panin an march pass a ni ta deuh ber awm e.
Extra & Technical thlirletna
T20 chu batter-te inkhel kan tih rualin, cricket thufing pakhat, "Batters chuan game an chakpui che u ang a, bowlers-in tournament an chakpui ang che u," tih chu a takin nemngheh a ni.
Tun IPL 2024-ah na na na chuan KKR bowling department ne ek pha an awm meuh lo a. Statistics enin, an bowler pangate, wicket la hnem leh runs pe tlem ber ber list a an awm hian a tichiang mai awm e.
An opening batsman pahnih Travis Head leh Abhishek Sharma te, 6 gear a bul ṭan nghal thei SRH te a hmawr bawk dawn hnaiah gear box problem an nei a, a innghahna te pahnihin field chhunga ball vuak aiin, an inthuamna bel chhunga hun an hman rei zawk miau avangin, kan lo thailan tawh plan B leh C an tlakchham rah an seng kan ti lo thei lo ang.
KKR coach Gautam Gambhir hi ṭawng no lo ve tak, thil pehhel ai chuan a ruh langa a nihna tak sawi pawp zel a ni. Kum 2011-a India-in World Cup nomawi an chawi khan player pawimawh a ni a, Member of the Parliament hlui a nih bakah mimal aia team dah pawimawh zawk a ni.
Gambhir hian batsman pakhatin century siam aia, bowler pakhatin wicket pahnih lek pawh la se, a inkhel boruak a zirin a ropui zawk a ti tlat ṭhin. Tun ṭum Silly Point pawh hi Gambhir-a thusawi, 'Dare to Dream,' hmangin kan han khar ang e. Mizo ṭawng chuan, "Mihring hi a inrintawk tlat chuan, eng harsatna mah hian a dal zo lo a, tumna a awm chhung chuan, kawng ping a awm thei lo," tihna a ni mai awm e.