Andy Murray a tla nghal

French Open an khel ṭan chiah a, world number 1 hlui Andy Murray chu hneh nei loin a tla nghal. Britain tlangval hi Stan Wawrinka lakah 6-4, 6-4, 6-2 in a chak lo a ni.

Murray leh Wawrinka te hi an vanglai chuan Grand Slam nomawi pathum ve ve la thei an ni a, an ṭhat lai chuan khawvel player ṭha leh hlauhawm berte zinga mi an ni, a hun hnuhnung lamah erawh hliamin tlakbuakin ngai an awh phak tawh lo.

Kum 37 mi Murray hian tennis chawlhsan a rilruk hnai a, a chawlh tur thu la puang chiah lo mah se British chanchinbu mite chuan kumin hi French Open a khelh hnuhnung ber a nih ngei an rin thu an ziak nasa hle a ni.

Pathianni zan inkhel dangah Carlos Alcaraz tan erawh harsatna a awm lo. Spanish star hian American player JJ Wolf chu 6-1, 6-2, 6-1 in a sawp a, harsa lo takin set thum a la zawn.

Kum 21 mi Alcaraz hi clay court-a inkhel thiam a ni a, mahse inelna lian French Open-ah hian a la champion lo, kumin hi atan hun ṭha nei thei tura ngaih a ni a, a match lehpekah chuan Dutch player Jesper De Jong nen an inhmachhawn leh dawn a ni.

Hmeichhe inelna lamah Naomi Osaka chuan harsa takin hnehna a chang thung. Japanese star hian Lucia Bronzetti chu 6-1, 4-6, 7-5 in a hneh a, season dang ang bawkin atan Roland Garros chu thil awlsam lo tak a ni leh dawn tih a chiang.

Champion tura rinkai zinga mi Jelena Ostapenko chuan Jaqueline Cristian chu 6-4, 7-5 in a hneh thung a, seeded 3-na Dayana Yastremska chuan set a hloh hmasak hnuah Ajla Tomljanovic chu 3-6, 6-3, 6-3 a hnehin; tualchhung nula Caroline Garcia pawhin second round a inhlangkai ve bawk.