Chelsea-in coach thar an zawng - McKenna a tel ta lo!

American sumdawng hausa Todd Boehly leh a thawhpuite hnuaia indinthar tum, kawng la zawh fuh hleithei lo Chelsea chuan coach an zawng leh ta - kum 2022-a Chelsea neitu an nih hnua coach palina tur a ni!

Chelsea hian kar hmasa Thawhlehni zan khan coach Mauricio Pochettino chu inhriatthiam tawnnain an inṭhenpui a, Argentine coach hian season tawp lamah Blues hi a chet ṭhatpui avangin fans tam takin cham turin an duh.

Mahse, London club thuneitute nen an inhmuh hnuah an thu a inhmu hleithei lo a, an inṭhen. Chelsea ṭantuten Poch a chhuak ta rau rau a nih chuan tiin, duhthu an sam a, an coach hlui Jose Mourinho, Antonio Conte leh Thomas Tuchel te hming a ri.

London club thuneitute erawhin an manager hluite lam an hawi lo. A tirah manager pathum - Ipswich Town coach Kieran McKenna, Leicester City boss Enzo Maresca leh Brentford manager Thomas Frank te an chhawp chhuak a, mahse, tunah chuan McKenna pawh hi a tel leh tawh lo a, Maresca emaw Frank an nih chance a sang ta hle.

McKenna chu

Top flight league lamah McKenna hian hriat la hlawh tawk lo mah se, English division hniam lamah erawh a lar viau - hei vang hian Chelsea hian an club enkawl turin an duh a, indawrna pawh an kalpui tawh.

Mahse, McKenna leh Chelsea ten indawrna an neih hnuah Northern Irish coach leh Blues an inrem thei lo a, Manchester United pawhin Erik ten Hag thlaktu tura an duh nia sawi coach hian Blues a enkawl leh dawn lo.

Chelsea hian an team dintharna kawngah coach naupang tak an duh nia sawi a ni a, McKenna hi kum 38 mi a ni. Mahse, Ipswich boss leh Chelsea duhdan a inmil lo a, a tawpah chuan thawhho loh mai an rel.

McKenna hi Brighton & Hove Albion pawhin Roberto de Zerbi thlak turin an thlithlai bawk a, Ipswich lamin contract thar an zawrh mek bawk a, khawi lamah nge a kal dawn a la chiang lo hle.

Tu nge McKenna?

Chelsea nen inrem thei ta chiah lo mah se McKenna hian top club chu a enkawl ngei a rinawm a, hei vang hian a chanchinin ngaihven a hlawh thar. Tottenham Hotspur academy-a inzir ṭhin niin, senior team tana a inlan hmain hliam vangin a chawl a, coaching lamah insawrbingin a inhmang zui.

Spurs-ah hian Head of Academy Performance Analysis niin football coaching lam a luhchilh ṭan a, a hnuah Spurs Under-18 coach a ni a, kum 2016 khan Manchester United-ah U18 coach tho ni turin a lut.

Red Devils-ah hian 2018-21 chhung kha assistant manager a ni a, December 2021 khan Ipswich Town a zawm. Hetihlai hian League One-ah an khel a, 2022-23-ah a vawi khat nan season tluan enkawlin, Championship-ah a kaipui nghal.

Championship-ah pawh Ipswich hi season khat chauh hun a hmanpui hman a, Premier League a inpetkaipui leh ta. A record a ropui a, chutihrual chuan English Premier League boruak a danglam a, 'Big Six' awmnaah a theihna tak tak hriat a ni thuai ang.

Pep-a nau!

Chelsea-in an beisei pakhat Maresca hi a tirah ngaihven zingah a tel lo nia sawi ni mah se, Blues-in McKenna an lakluh theih tak lohah chuan a hming a ri ring lehzual - London club hian an dawr tawh a, Maresca hian enkawl a châk hle niin an sawi.

Maresca pawh hi kum 44 mi chauh a la ni a, coach naupang duh Chelsea nen an inrem thlap. Maresca hian Manchester City U23 lo enkawl tawhin, Premier League 2-ah nomawi a lo chawipui tawh a, Pep Guardiola hnuaiah assistant manager-in a thawk tawh bawk.

Serie B-ah Parma lo kaihruai tawhin, Serie A a kaipui theih loh avangin kum chanve pawh tling loah an ban. Mahse, season hmasa khan Leicester City a enkawl a, Premier League aṭanga tla hlim Foxes hi season khat bak Championship-ah hun a hmanpui lo - English second division champion a nihpui a, Premier League-ah a hruai kir.

Blues hi a zawm a nih chuan Pep-a'n a naute hlui pahnih elpui tur a nei dawn tihna a ni. City-a Pep-a assistant ṭhin Mikel Arteta chuan Arsenal enkawl mekin, season tharah pawh Pep nen league nomawi inchuha inum leh ber tura ngaih a ni.

Frank hi

Brentford-a a hnathawh ṭha tak avangin Thomas Frank-a'n ngaihven a hlawh a, European football-a club lianten coach an thlakin a hming a ri ve reng ṭhin - tunah pawh kum 50 mi coach hi a hming lam rik a ni ve leh ta a, Chelsea nen eng ang takin nge an indawr tawh erawh sawi theih a ni lo.

Danish coach hian kum 2021 khan Brentford hi Premier League a hruai kai a, club tenau leh budget nei tlem tan English top flight league-a cham chhunzawm reng a harsat tehlul nen, Frank hian Brentford hi Premier League-ah a champui reng thei.

Hei vang hian Frank-a'n champion nomawi lian tham sawi tur la nei lo mah se, English football-a coach ṭha sawi a nihin sawi hmaih a ni ngai lo. Hetihrual hian 'Big Six' boruak erawh a danglam tih hriat tel a ṭha.

Chelsea hian VfB Stuttgart manager Sebastian Hoeness pawh an en thla nia sawi a ni a, mahse, kum 42 mi coach hian Bundesliga-a pahnihna a nihpui club-ah hian kum 2027 thleng cham turin contract thar a ziak a, thlem chhuah a harsa tawh ang!

De Zerbi

Chelsea-in a tirah McKenna, Maresca leh Frank an lam ri a, tunah chuan De Zerbi hming a ri ve leh tawh - Brighton boss hlui hi Chelsea hian an be pawp tawh niin khawthlang media-te chuan an tarlang.

Blues hian Brighton boss hlui Graham Potter kha coach man to ber ni turin Brighton an lo chhuhsak tawh a, pound maktaduai 62 chuangin Marc Cucurella an lei tawh a, £100mtd za chuangin Moises Caicedo an la lut tawh bawk.

Mahse, Potter an ban tawh a, tun thlengin Cucurella leh Caicedo te an man phuin an lo khel lo bawk. Hei vang hian De Zerbi hming a ri pawh hi Blues fans tam tak an hlauthawng.

Hetihrual hian De Zerbi hi budget nei tlem tak chunga Premier League team hmuhnnawm ber pawla Brighton chhuah thei a ni a, Europa League hial a khelhpui - Blues enkawl se, Cucurella leh Caicedo te an theihna ang taka khel chhuak tura a pui thei a nih ringawt pawhin Chelsea tan a hlawk ang.