A tawp khar nan Juve an chak

Juventus chuan tun season an match hnuhnung berah Monza chu 2-0 in an hneh a, beisei angin season hmang ṭha thei lo mah se season tharah Champions League an khel dawn a, insiamṭha turin remchang a nei dawn tihna a ni.

Pathianni zan Serie A inkhelah Old Lady tan Federico Chiesa leh Alex Sandro ten goal khat ve ve an khung. Sandro hian Juve tana a match hnuhnung ber a khel a, ani bakah hian Danilo leh Daniele Rugani te match tawpna a ni bawk.

Turin club hian season tir lamah kha chuan Inter Milan leh AC Milan te an elphak, a tawp lamah erawh Inter an phak lohna a sang ta hle. Italian club lian zinga a hnufual bik nih reng an duh dawn lo, nipui chawlh an hman ṭhat a ngai dawn a ni.

Italian champion Inter Milan chuan a tawp khar nan Hellas Verona chu 2-2 in an inhnehtawkpui a, pahnihna AC Milan pawh an mikhual Salernitana nen goal thum ve ve khungin an inhnehtawk.

Serie A aṭangin season tharah - Inter Milan, AC Milan, Juventus, Atalanta leh Bologna ten Champions League an khel dawn a, season chawhnu lama beiseina nei thar AS Roma erawhin UCL ticket an nei phak ta lo. Europa League lamah an inlan a ngai dawn ta zawk a ni.