Catalunya-ah Bagnaia a chak

Pathianni zana tlan zawh tak - Catalunya MotoGP a hmuhnawm a, rider ṭha bik zinga mi Francesco Bagnaia chuan hnehna changin rider championship lama hmahruaitu Jorge Martin nen an inkar a ti zim.

Hun rei tak chhung chu Martin zawkin hma a hruai, mahse lap 20 an tlan laiin Bagnaia hian a tlan pel a, world champion vawi hnih ni tawh hian hnung lam hawi kir tawh loin hnehna a chang.

Italian rider Bagnaia hi Inrinnia Sprint Race an tlan laiin a che fuh lo, intlansiak takah pawh chetsual leh mai hlauhthawnna a lian hman, mahse ti sual nawn loin a chak a, a chunga awm Martin nen an inkar chu point 39 chauh a ni ta.

Ducati rider Bagnaia chuan, "Sprint race tih fuh loh hi chuan hlauhthawn a na duh, chutiang kara hnehna chan theih chu a hlu hle. Bike a ṭha a, team thawhhona a ṭha bawk," a ti. Bagnaia leh Martin te hnungah hian Marc Marquez a thleng thung.

Bike intlansiakna sang ber hi June 2, Pathianni zan tirah an tlan chhunzawm leh dawn. Mugello Circuit-ah Italian Grand Prix an tlan dawn a ni.