An ramah Leclerc chungnung

Formula 1 intlansiak a nih tawh chuan Max Verstappen chu chak tura rin a ni nghal ngawt ṭhin. Pathianni zana tlan Monaco Grand Prix-ah erawh thil a danglam, tualchhung tlangval Charles Leclerc a chungnung ber.

Intlansiak neih hma aṭangin Verstappen chuan Red Bull tan a harsat tur thu a sawi a, tlankawng awm dan chu an team tana hmun ṭha a ni loh thu leh theihtawpa an beih tho tur thu a sawi lawk, an tum ang erawh chuan an che thei ta chiah bik lo.

Lap hmasa ber an tlan laiin chetsualna a thleng nghal a, intlansiak an chhunzawm leh hnuah pawh a hmasa ber (Pole) aṭanga tlan ṭan Leclerc a chungnung zui a, tun season intlansiak vawi riat an neih tawh china a vawi khat nan hnehna a chang.

Ferrari driver Leclerc chuan, "Formula 1 driver nih hi ka duhthusam a ni ṭhin a, chumi rual chiah chuan Monaco GP-ah hnehna chan hi ka suangtuah tel nghal ṭhin, chumi hun chu tunah hian a lo thleng dik a ni," a ti.

Hnehna chang mah se driver championship-ah erawh Verstappen a la sang fal. Dutch driver hian point 169 hmuin a chung berah a awm a, amah hnaih bertu Leclerc-a'n point 138 a hmu thung.

Season hmasa khan Verstappen hian F1 a thunun hneh hle, tun season erawh thil a harsa hret dawn niin a lang. June 9, Pathianni zan hian Canadian Grand Prix an tlan leh dawn a ni.