Champions League final khel lo tur Tchouameni

Real Madrid midfielder Aurelien Tchouameni chuan a ke phah hliam vangin Champions League final a khel thei dawn lo a, France international hi Euro 2024-ah pawh a inlan thei ang em, a la chiang lo.

La Liga champion Real hian final lut turin semifinal-ah Bayern Munich an hneh a, German club nena semifinal second leg an khelh ṭumin kum 24 mi midfielder hi a inhliam. Final a khelh thei mai beiseina awm mah se, a inlan loh a rinawm ta zawk.

Madrid manager Carlo Ancelotti chuan, "Amahin training a nei mek a, mahse, final meuh khel tur chuan a la inpeih lo. Euro 2024 khel turin a inpeih em, hei pawh sawi theih a la ni lo," a ti a, a player dinhmun ngaihchan phawt a la ṭul thu a sawi.

Real hian June 1, Inrinni zan dar 12:30-ah Borussia Dortmund nen Champions League final an khel dawn a, a vawi 15-nana champion turin an lakah beiseina a sang hle.

Season hmasaa Real Madrid pantu Tchouameni hi Spanish champion tan player pawimawh a tling phak a, tun season inelna hrang hrangah match 38 khela goal thum khungin, assist vawi khat a nei.

France coach Didier Deschamps chuan Euro 2024 khel tur player 25 hming a puan zingah France tan vawi 31 inlana goal thum khungtu Tchouameni hi a telh a, mahse, Germany-ah ram aiawhin a zin thei ang em, a chiang ta lo.

Les Bleus hi group D-ah awmin, Austria, Netherlands leh Poland te nen an awm ho a, an group hi a awlsam dawn lo - January 17 zanah Austria nen an match hmasa ber chu an khel ang.