United-in Olise an hnaih

Manchester United chuan Crystal Palace winger Michael Olise lakluh tumin an hel mek nia sawi a ni a, Chelsea pawhin Olise hi duh ve mah se Red Devils nen hian an inhnimhnai zawk niin khawthlang media-te chuan an tarlang.

United leh Olise inhnaih zawk chhan pakhat erawh Chelsea hian winger dang an melh tho vang a ni a, London club hian Athletic Bilbao forward Nico Williams lakluh an duh avangin Olise hi an rim na lutuk lo niin a lang.

Season duhawm tak hmangtu Olise hian a contract-ah chhuah theihna dan a nei thlap a, "Pound maktaduai 60-a dawrtu an awm chuan a chhuak thei ang," tih a inziak tel thlap - United hian heti zata an ngam a nih chuan Olise hi an chang ngei dawn niin a lang.

Manchester United-a share nei thar a, football inrelbawlna lama thuneihna pumhlum an pek Sir Jim Ratcliffe chuan United hi din thar tumin hma a la mek a, Mason Greenwood leh Antony pawh hralh a tum nia sawi a ni.

British sumdawng hausa hian team dintharna kawnga hmalakna hmasaah Olise lakluh hi a nei niin a lang a, a awm lo hran lo. English forward hi kum 22 mi chauh la niin, hmabak êng tak a nei a, tun season-ah league match 19 khela goal 10 lai khungin, assist vawi ruk a nei bawk.