Rafael Nadal-a'n French Open a mangṭha

Engmah sawi lawk theih a ni lo a, a hrilhfiahna leh sawifiah nan pawh eng thumal mah a tawk zo chuang lo ang. Rafael Nadal hian French Open a khel leh ang em tih chu tuma sawi theih a ni ta lo, hunin a la hrilh dawn a ni.

Roland Garros a nih tawh chuan Nadal nen hian a inzawm tlat a, a bik takin an khelmual chhuanvawr Court Philippe Chatrier phei chu a tana hmun nuam leh ṭha, midangin an chuhpui thiang lo ang maia a ta neih a ni ṭhin.

Tunah erawh hun a liam tam ta a, thil a danglam zel ta si! Nadal hian French Open 2024 chu a khel ngei mai a, mahse a match hmasa berah Nadal hian Alexander Zverev chu 6-3, 7-6 (7-5), 6-3 in a hneh lo.

Mittui nen tennis court a chhuahsan a, a hmuna entu mai bakah khawvel hmun hrang hranga Nadal chetla lai entute chuan ui tak chungin an thlah - French Open a khel leh lai en duh mah se, beisei san ngam chi a ni tawh lo ang.

Nadal a inkhel

Vawi 14 a champion tawhna hmun a ni a, tun hma chuan Roland Garros match 116 a khelh aṭangin vawi li chauh chak loh a nei, seeded chan loh pawh a nei ngai lo, a tir lamah player ranking sang a hmachhawn ngai lo tihna a ni.

Mahse, season hnih chhung chu Nadal hi a inkhel mumal thei ta lo, nikum phei kha chuan French Open aṭang hian hun tepter tawh takah a inhnukdawk a, hliam vangin a hnu lamah pawh ṭha taka khelh a nei thei rih lo.

World number 275-naah a tlahniam a, inelna lian Grand Slam khel tuin seeded a ni phak lo, wildcard hmanga inlanin a tir lamah player ranking sang a hmachhawn a ngai, a inlan hnuhnung bera a hneh tak - seeded palina a tum a ngai a ni.

Tennis tan mi bik a ni a, a bik takin French Open tan a hlu zual; a match hnuhnung ber a nih theih avangin a player puite ngei pawhin a hmunah an en, entu zingah mipa leh hmeichhe world number 1 Novak Djokovic leh Iga Swiatek te pawh an tel.

“Rafa! Rafa!” tiin inkhel entute an aurual a, a khingpui Zverev tan pawh hmachhawn nuam lo tak a ni ngei ang. Mahse, German tlangval hi uaithla tawh Nadal tan paltlang ngawt theih a ni bik lo, inelna a nih avangin zah tak chungin point lamah zahngaihna lantir a rem bik lo.

Zverev a chak

French Open 2022 semifinal-ah khan player pahnih hi an intawng a, inkhel boruak sang leh hmuhnawm takah Zverev hi a vanduai, a kerek hliam vangin a inkhel zui thei lo, amah pawhin a kal chhuak thei lo a, wheelchiar hmanga nawr chhuah a ngai hial.

A hliam damin ṭha takin a inkhel thei leh tawh a, tunah chuan a dingchang zawkah a ṭang ve ta. Set hmasa ber chu minute 50 chhungin 6-3 in a la a, set hnihnaah erawh an inkhel tawk takzet, tie break khelh hnuah Zverev hi a vannei zawk a ni.

Set thumnah 2-0 in Rafa a hniam leh phawt a, chumi hnuah nasa takin bei let mah se a tho chhuak tlang zo ta lo. Darkar thum leh minute nga an inkhelh zawh meuh chuan kum naupang leh thahrui la ngah zawk, tunlaia khel ṭha tluang bawk Zverev a chak.

Nadal chuan, "Match hmasa ber hetiang taka a hautak hi chu ka beisei ngai loh thil a ni, set la turin remchang te pawh ka hmu ve nual a, mahse ka chhawr ṭangkai thei tlat si lo, a awmzia chu Sascha (Zverev kohna) kha a khel ṭha zawk a ni," tiin a sawi.

French Open website chuan inkhel chungchang chu ti hian an ziak a, "A tir aṭanga a tawp thlengin a hmuhnawm, a khat tawkin min barakhaih thil a awm deuh reng bawk. Inkhel quality sang leh hmuhnawm a ni a, a uiawm lai chu first round chauha khatiang match kan hmu nghal kha a ni," an ti.

Kir leh a tum

Inkhel a zo a, inkhel entuten Nadal-a hming an lam a, ṭawng rinna (microphone) a ken hnuah pawh mipui thawm a ngaichang deuh phawt, chumi hnuah Rafa chuan, "He tennis court aṭanga ka tawnhriat leh thil neihte hi sawi vek sen a ni lo.

"Hlawhtlinna tam tak ka chang tawh a, hlimna leh lawmna chhiar sen loh ka chan tawhna hmun a ni bawk, kum 38 ka tlin dawn tawhah pawh hetiang chawimawina hi ka dawng ang tih ka ring phak bik lo hial.

"He hmunah hian ka lo kir leng dawn em tih hi sawi a harsa hle a, ka tan chuan Roland-Garros khelh lehna chance hi a tlem hle a ni, thil pakhat 100% a chiang erawh chu he hmun hi a nuam ka tiin ka hlim hle.

"French Open ka khel thei ta lo a nih pawhin, kumin nipui lai hian Paris khawpuiah hian Olympic khel tur chuan lo kir leh ngei ka tum," a ti a, clay court inelna lian leh ngaihhlut chu a la thlah fel ṭhak thei bik lo.

Nadal tan chuan clay court season a zo leh rih a, a vanglai pawha a khelh tam loh grass court inelna hmachhawn ai chuan taksa enkawl ṭhat a, an ram Spain tana Paris Olympic khel tura inbuatsaih a tum zawk niin a lang.

Medvedev a chak

Thawhṭan zan French Open inkhel dangah Daniil Medvedev chuan hnehna a chang. Russian star hian a khingpui Dominik Koepfer lakah fiahna tawk mah se 6-3, 6-4, 5-7, 6-3 in a chak, second round-ah chuan Dominik Koepfer a hmachhawn leh dawn a ni.

World number 5 Medvedev hi clay court-a inkhel thiam tak a ni hran lo - French Open bikah pawh hian second round a luh vawi thumna chauh a ni a, thleng sang tur chuan kum dang ang lo takin a chet a ngai ang, chutihrualin tun season a hman dan en erawh chuan beisei a nei ngam ang.

US Open 2021 champion Medvedev chuan, "A pawimawh ber chu hnehna ka chang hi a ni, set ṭhenkhatah kha chuan a khel ṭha lo zawk ka ni ngei mai, ṭhenkhatah erawh a vannei zawk ka ni thung, rei lutuk chhung khelh ngai loa ka tlang pawh a lawmawm.

"Champion tura rinkai ka ni lo a, engtikah nge ka chak loh ang tih hi mi tam tak lo ngaihtuah a ni tih pawh ka hria. Mahse, keichuan a sang thei ang ber thlen ka tum, ka tih theih ngai lih tih tumin ka bei dawn a ni," tiin a sawi.

Inkhel dangah Jannik Sinner pawhin Christopher Eubanks chu 6-3, 6-3, 6-4 in a hneh a, kum 22 mi Sinner hi match tir lamah a service a ṭha tawk lo, a hnuah erawh a insiamṭha thung. Stefanos Tsitsipas pawhin Marton Fucsovics chu 7-6 (9-7), 6-4, 6-1 in a hneh ve bawk.