An phu angin Celtics hlawhtling

Boston Celtics chuan Indiana Pacers lakah game an hloh miah lo a, team ṭha leh chungnung zawk an nihzia lantir chungin NBA Eastern Conference champion an ni a, best of seven series chu 4-0 in an la a ni.

Nimin zing conference finals game 4 inkhelah Boston hi 105-102 in an chak, hnehna an chan theih nan hian Derrick White chuan hun tawp dawnah 3-points a theh lut a, over time khelh hah ngai loin a chak tlang.

Tun hnai season thum chhunga a vawi hnih nan Boston Celtics hian NBA Finals an thleng, regular season khelh laiin team hmuhnawm bik zinga mi an ni ṭhin bawk a, champion tura buk rit pawh an ni leh dawn.

Boston Celtics chak theih nan hian ni dang ang bawkin Jaylen Brown a khel ṭha. Brown hian point 29 a nei a, Eastern Conference Finals Most Valuable Player (MVP) atan thlan a ni.

Brown bakah hian Jayson Tatum a langsar leh bawk - Tatum hian point 26 a neih bakah rebound vawi 13 a la a, assist vawi riat nei bawkin conference champion an nih theih nan tha a thawhhlawk takzet.

Eastern Conference Finals MVP Brown chuan, "Mimal ni loin team thawhrah a ni, squad-ah hian player ṭha leh tawnhriat ngah tak tak an tam, chung mite zarah chuan ka lang mawi, anni bakah hian coaching staff kan nei ṭha bawk," a ti.

Basketball inelna lian leh ngaihhlut NBA Finals-ah a vawi 23 nan an inlan dawn a ni a, nomawi chawi tur chuan Dallas Mavericks leh Minnesota Timberwolves inkhela a chak zawk an hneh leh a ngai ang. Dallas hian 3-0 in series-ah hma an hruai mek, tukin hian game 4 khelin an chak leh a nih chuan an tlang chiang der ang.

Celtics head coach Joe Mazzulla chuan, "Ka naute theihna hi en ula, chik taka in lo en ṭhin a nih chuan tuna kan thlen chin hi mak in ti lo ang, anni kan kaihruai thei hi coaching staff tan chuan chanchin lawmawm tak a ni zawk.

"Coach tan chuan keimahni min ring ngam a, kan duh leh beisei anga khel thei player neih aia hlu a awm thei tawh chuang lo ang," tiin a naute chungah a lawm a, NBA champion tur erawh chuan hmabak an la nei sang tih a sawi bawk a ni.