PVL final khel tur Hunthar

Ather Pro Volleyball League 2024 mipa final khel turin Hunthar an chak - season hmasa finalist hian semifinal hmasa zawkah Chhinga Veng Spikers chu 25-22, 25-23, 26-24 (3-0) a sawpin final an lut.

Hunthar hian tun season PVL an khelh tawh chinah harsatna an la tawk lo. Thawhṭanni zan LPS Arena, Falkland Venga inkhelah pawh hian a tir aṭanga a tawp thleng inkhel an thunun thei a, league hmahruaitu an nih ang ngeiin an chungnung zui ta zel a ni.

Nizan khan Thutak Nunpuitu Team (TNT) leh Tuichangral ten semifinal hnuhnung zawk an khel a, heta chak zawk leh Hunthar ten nomawi an inchuh ang; nikum khan TNT hian Hunthar hnehin nomawi an lo chawi tawh a ni.

Hunthar an ṭha

PVL 2024 an ṭan dawn khan Hunthar coach VL Malsawma Renthlei chuan, "Season hmasa aiin player kan ṭha zawk tiin ka sawi ngam lo a, inbuatsaihna erawh kan nei ṭha zawk," tiin Vanglaini a hrilh a, coach tawnhriat nei ṭha thusawi hi a dikzia kan hmu chho zel.

Kum 2019 champion Chhinga Vengin set hnihnaah 21-19-in hma an hruai hman a, set thumna la thei turin 22-18-in an kalsan bawk. Mahse, boruak sangah harsatna an tawk a, Yougank Baliyan a mal tan nasa hle.

PVL kum 2017 leh 2018 champion Hunthar tan Anurag Rawat chuan vawi 23 vaw tlain point kua a hloh a, Fabian Lallunghnema'n vawi nga tisual chungin point 15 a thawk chhuak a, inbeihna tak takah an rintlak.

Spikers tan Yougank chuan point 34 hmuin 11 a hloh a, mi malin che tha fal hle mah se a team-te set a lakpui zo lo a; amah thlawp thei ber Lalramhluna'n set hnihna aṭangin a khel a, ṭum riat hlap tlain vawi thum a tisual.

Inrintawkna sang tak nen Huntharin bul an ṭan a, setter Remsangzuala'n (Lalmama) ball sem rualin Lalnunfela'n a vuak tlak rualin 16-11-in set khatnaah an sang a; lehlamin an hnaih zo lo.

Set hnihnaah Chhinga Vengin na zawkin an nawr let a, 16-16 a nih hnuah an kalsan. Yougank chuan a vanglai hmangin a elpui Anurag aiin a langsar a, a hmaa ball chhuak hlap tla zelin 21-19-in Spikers an sang.

Huntharin an paukhauh zawk tih lantirin Fabian-a'n a vuaktlak hnuah Chhinga Veng spiker Ramhluna hlap an dansak a, an nih rual. A hnuah 23-23 a nih laiin Ramhluna'n a service sual a, Anurag chuan set an lak zawn theihna hun tha tihlawhtlingin sang tak aṭangin a vaw tla.

Chhinga Vengin tan hmun siam thar lehin set thumna la thei turin beiseiawm takin an khel a, Anurag leh Wilson Lalremruata'n an vuak sual zawn hnuah 22-18-in an sang.

Mahse, hun pawimawhah talbuai lehin Yougank tih loh player dangin vuak tlak an harsat a, Hunthar tan Fabian-a'n a hlap tlak hnuah Anurag chuan point thum hmu zawnin 22-22-in an nih rual.

Chhinga Veng hi 23-22-in sang leh mah se Huntharin net chung atangin Yougank-a vuak an dansak a, inhnehtawk taka 24-24 a nih hnuah Yougank-a hlap dansak lehin Anurag chuan dan theih lohin a vaw tla ve thung a ni.

Hunthar player-ten ngampa takin an khel tluan thei a, C Lalhriatpuia'n ṭum kua vaw tlain point li a hloh a, Nunfela'n vawi khat chiah tisualin point ruk a hmu a, hnehna an chan theih nan an pawimawh hle.