League palia top scorer ni thei Ronaldo

Saudi Pro League-ah Cristiano Ronaldo-a'n goal a khung tam ber a, Portuguese forward hi ram palia top scorer ni thei hmasa ber a ni. Saudi Arabia league sang bera top scorer a nih hma hian Premier League, La Liga leh Serie A-ah te top scorer a ni tawh.

Ronaldo goal 2

May 27, Thawhṭanni zan khan Al Nassr-in Al Ittihad an mikhual a, Ronaldo goal hnih hmangin 4-2 in an chak. Al Nassr goal hmasa pahnih hi Ronaldo khung a ni a, first half injury time-ah tlarhnung aṭanga ball an vawrhluh chu a awm (chest) hmanga la thlain ṭha zetin a pet goal. Hemi hma hret hian Ronaldo hian Sadio Mane ball pek chu goal-ah pet mah se offside vangin pawm a ni lo.

Al Nassr tan Ronaldo a langsar a, goal hmaah a hlauhawm ṭhin hle. Minute 69-naah Ronaldo hian corner kick aṭanga ball kal chu a tauh lut a, Portuguese forward hian ṭhing ṭhiin a goal khung a lawm - inkhel a lak thutak zia a pholang. Ronaldo lakchhuah hnuin Abdulrahman Ghareeb-a'n a khung belh.

Al Ittihad-in Al Shamrani leh Fabinho hmangin siphurh an sut ṭhen a, Ronaldo awm tawh lohna Al Nassr talbuai hman deuh mah se injury time-ah pawh minute nganaah Meshari Al-Nemer-a'n chak nemnghetna a khung.

Saudi Pro League khelh zawh a ni a, Al Nassr hian match 34 aṭangin point 82 hmuin season zawnin pahnihna an ni. SPL-ah chak loh nei loin Al Hilal an champion a, point 96 zet an hmu.

Ronaldo leh Record

Ronaldo hi kum 39 mi ni tawh mah se goal khung a la thiam reng. Tun season SPL-ah goal 35 khungin top scorer a ni a, season khata goal khung tam ber record a siam bawk. SPL-ah hian 2018-19 season khan Morocco striker Abderrazak Hamdallah-a'n goal 34 a khung a, ani pawh hi Al Nassr tana khel ṭhin tho a ni.

Ronaldo hian Abderrazak Hamdallah record hi a khum a, tun season inelna hrang hrangah match 50 khelin goal 50 a khung. Season khat leh a chanve chhungin Ronaldo hian match 69 aṭangin goal 64 a khung a, a record hi a ropui hle.

Sporting CP aṭangin Ronaldo hian Manchester United a zawm a, English club-a a khelh lai hian winger ni mah se goal hmaah a hriam ṭhin hle. 2007-08 season khan Ronaldo-a'n Premier League-ah goal 31 khungin top scorer a ni a, Real Madrid a zawm hnuah goal khung theih vangin a lar lehzual.

La Liga-ah Ronaldo hian season kua khelin ṭum thum top scorer a ni a, season tinin goal 25 aia tlem khung a nei lo. 2011-12 season-ah phei chuan Ronaldo hian goal 46 a khung hial a, a tam zia nemnghettu chu tun season La Liga-ah team anga goal 46 khung tling lo team 10 an awm.

Madrid aṭangin Ronaldo hian Turin a pan a, goal a khung chhunzawm zel. Juventus tan season thum khelin Serie A top scorer ṭum khat a ni a, season thumah hian goal 20 a khung tling vek.

Ronaldo hian kum 22 chhungin Sporting Lisbon, Manchester United, Real Madrid, Juventus leh Al Nassr tan khelin club tan goal 765 a khung tawh. Ram tana goal khung tam lamah pawh record siamtu a ni a, Portugal tan match 206 aṭangin goal 128 a khung tawh. Euro 2024 Portugal squad-ah Ronaldo hi a la tel a, a khung belh zel pawh a rinawm.