Martial-a'n United a chhuahsan dawn

Manchester United forward Anthony Martial chuan season kaw chhung Old Trafford-a cham hnuah a chhuah tur thu a puang. French forward hian kum 2015 khan Monaco aṭangin pound maktaduai 36-in Man United hi a zawm a, khawvel teenager manto ber ni mah se besei angin a che ṭha zui lo.

Kum 29 mi Martial hian Man United tan match 317 khelin goal 90 a khung a, club tana a khelh hnuhnun ber chu nikum December 9-a Bournemouth 3-0 a an hneh loh ṭum kha a ni. Kumin January khan a ṭhal an zai a, hemi hnu hian training zawm leh mah se first team squad-ah a tel pha tawh lo. Tun nipuiah hian a contract a tawp dawn a, club lamin an pawhsei sak loh avangin a chhuah a ṭul ta a ni.

Martial chuan, "Mangṭha tih a ṭul mai hian hnuk pawh a tiulh hle. Kum kua hun kan hmang ho a, tunah chuan kawng thar zawh a ṭul ta. Kum 2015-a helai hmun ka rawn pan aṭang khan United kawr hi chhuang takin ka ha ṭhin a, inhmaa inkhelh hi nuam ka ti. Khawvela ṭantu ṭha ber in ni a, Manchester United hi ka thinlungah a cham reng ang," tiin thlahna thu a ziak.

French forward Martial-a'n United tana a bul ṭan dan hi club ṭantute chuan an theihnghilh tawh lo ang. September 12, 2015 khan Liverpool an hmachhawn ṭumin jersey no. 9 a rawn ha a, Reds defender bum kualin Stretford End hmaah goal ropui a khung. Martial hian Man United hi Carabao Cup, FA Cup leh Europa League nomawi te chawipui mah se beisei angin a che ṭha zui lo. France tana a khelh hnuhnun ber pawh kum 2021 daih tawh kha a ni.