Shaw-a'n amah sawiseltute chhanglet

Manchester United defender Luke Shaw chu kumin February aṭang khan tihrawl hliam vangin a inlan tawh lo. England tana koh a nih tak tho avangin Erik Ten Hag-a hnuaia khel ṭha duh loa ngaitu an ṭhahnem.

Kum 28 mi Shaw chuan, "Manchester United tana khelh aia châk hi ka nei chuang lo. Social media-a thu lengvak chhanlet hi ka ti ngai meuh lo a, mahse club tana rinawm loa min chhuahtu an tam avangin chhanlet hi a ṭulah ka ngai.

"England tana khel thei reng si, United tana khel thei loa min ngaitute hriattur chu. Tunah pawh hian 100%-in ka fitness a la ṭha chuang lo. Mahse, ka theihna zawng zawng chhahin inkhel thei turin ka inpuahchah. Man United tan hian kum 10 chhung ka khel tawh a, chet ṭhat leh chet chhiat ṭum ka nei a, club tana rinawm lo anga min chhuah hi chu na ka ti.

"Tuna ka hmachhawn lian ber chu inkhel theih tura inpeih a ni a, nipuiah eng pawh thleng se season thara inkhel thei tura inpeih ka duh," tiin a sawi.

English left back Shaw hian kum 2015 khan ke ruh tliak vangin hun rei tak a chawl a, inhliam vang hian season hnih chhung talbuai deuh mah se ṭha takin a rawn kir. England-in left back-a khel thei tur Kieran Trippier, Joe Gomez, Ben Chilwell leh Levi Colwill te nei mah se Gareth Southgate pawhin Shaw tel loa Euro 2024 hmachhawn a zuam lo niin a lang.