Swiatek leh Gauff an chak

French Open hmeichhe champion tura rinkai Iga Swiatek leh Coco Gauff te chuan inelna bul an ṭan fuh a, player pahnih hian harsa lo takin first round an paltlang.

Thawhṭanni zan first round inkhelah Swiatek hian Leolia Jeanjean chu 6-1, 6-2 in a hneh. Court Philippe Chatrier-ah darkar khat leh minute khat chhung lekin hnehna a chang, a match lehpekah chuan Naomi Osaka a tum dawn a ni.

World number 1 Swiatek chuan, "Grand Slam khelh hi chu a nuam a, a bik takin ṭha taka khelh theih hi a lawmawm zual ṭhin," a ti. Hmeichhe zingah Justine Henin (2007) hnua Roland Garros title a zawna vawi thum la thei hmasa ber nih a tum ang.

Inkhel dangah Coco Gauff chuan world number 208 Julia Avdeeva chu 6-1, 6-1 in a sawp a, American tleirawl hian major tournament bikah match 50 a chak tling ta chiah.

Kum 20 mi Guaff hian season hmasa khan US Open nomawi a chawi, tun hmain French Open hi ṭha takin a lo khel tawh a, final hial pawh a lut tawh, kuminah champion tum ngam zinga mi a ni.

Second round-ah chuan Gauff hian Tamara Zidansek a hmachhawn ang. Slovenian nula Zidansek hian inkhel dangah Belgian mi Alison Van Uytvanck chu 6-2, 2-6, 6-1 in a lo hneh ve bawk.