Barca coach thar chuan hrehawm a tuar ang - Xavi

Barcelona nena inṭhen ta Xavi-a'n Catalan club enkawltu thar tur chuan a tawrh a ngaih tur thu a sawi hem mai - Barca legend hi a club nen ṭha lo takin an inṭhen a, coach thar lut tur tan ṭawngkam ṭha hman a tum bik lo.

Xavi chuan, "Manager thar hnena ka sawi duh chu hei hi a ni, hrehawm i ti dawn..." a ti hmiah mai - amah bantu Barca president Joan Laporta tan ngaihthlak nuam a ni lo ang tih a chiang a, amah thlaktu tur Hansi Flick tan a nuam lo lehzual ang.

Flick hian Barcelona hi a enkawl ngei dawn niin khawthlang media-te chuan an tarlang a, he thu buatsaih a nih lai hian thuchiang erawh a la awm lo. Bayern Munich boss hlui hian season hnih atan contract a ziak dawn niin an sawi a, kum khatah euro maktaduai 10 a hlawh dawn.

Barcelona hian season hman zawh takah nomawi chawi an nei lo. Champions League quarterfinal-ah an tla a, league-ah Real Madrid phak loin pahnihna an ni. Real hi point 10-in an phak lo a, Carlo Ancelotti naute hian point 95 an hmu tih erawh hriatsak ila.

Thawnthu hlui

November 2021 khan Barcelona sawmna chhangin Xavi hi Nou Camp-ah coach ni turin a kir a, amah ang thoa club legend, mahse, ban tak Ronald Koeman a thlak - Qatar lamah Al Sadd a chet ṭhatpui avangin a chungah beiseina a sang a, fans an phur.

Xavi hi player a nih laia ropui taka Barca tana lo khel tawh a nih avangin lawm a hlawh lehzual a, Catalan club a enkawl ṭantirh hian sum lama harsatna an tawh piahlamah khelmualah an buai tel a, league table-ah pakuana an ni!

Mahse, November thla tawp lama a enkawl ṭan chauh chungin league-ah pahnihna ni chungin season an khar a, Xavi-a'n hna a thawk ṭha. 2022-23 season a thlen phei chuan league nomawi a chawipui a, mahse, Champions League-ah group stage aṭangin an tla thung.

Barca hian 2022-23 season-ah hian Spanish Super Cup nomawi an chawi tel a, team pali inelna a nih tawh avangin tun hma aiin a hlu zual bik. Hei vang hian Barca fans an phur a, beiseina sang tak nen 2023-24 season an thlir.

Mahse maw

Beisei angin thil erawh a kal vek bik lo. Barca-in 2023-24 season-ah nomawi chawi an nei lo - Barca hmangaihtu Xavi-a'n Catalan club tana ṭha ber tur ngaihtuah chungin, January 2024 khan season tawp ruala Barca a chhuahsan tur thu a puang.

Hetihlai hian Laporta leh a thawhpuiten Xavi chelh an tum hran lo. Mahse, Spanish coach-in a chhuah tur thu a sawi hnuah match 13 zet a zawnin Barca chu tlawm nei loin a kalpui a, heng zingah hian match 10 chu an chak hial.

Laporta-a'n Xavi chelh dan a ngaihtuah zui a, Spanish coach-in a chhuah tur thu sawi mah se, amah thlaktu tur lak an tum rih loh thu leh, Xavi thutlukna an ngaihchan phawt thu a sawi - Xavi chu a thlutlukna sut a, cham turin a duh.

Xavi-a'n a pu duh angin thutlukna a siam a, Barca-a a cham tur thu a sawi. Catalan club-ah season khat dang a cham tur thu a sawi a, Barca-in coach zawn an chawlhsan zui a, an club legend hoa season thar hmachhawn dan tur an thlir.

Laporta a na!

Xavi-a'n a cham tur thu a sawi hnuah May thla khan press a hmachhawn a, Laporta thinlung nghawr nghing dawt a sawi. Xavi chuan, "Madrid el tum kan ni a, mahse, fan-ten kan sum dinhmun a ṭhat lohzia an hre chiang a, financial fair play hnuaia sum dinhmun ṭhate ang kan ni ve lo.

"Fan-te pawhin hun kan mamawh tih an hriatthiam ka duh a, chutihrual chuan nomawi chawi tumin kan bei lo ang tihna erawh a ni lo. Nomawi chawi turin theihtawp kan chhuah zel ang," a ti.

Xavi-a'n vantlang hriata an sum dinhmun ṭhat loh thu a sawi hi huat tur em em awm lo mah se Laporta-a'n a ngai haw tlat a, vantlang hmaa club dinhmun chuti taka Xavi-a'n a sawi chu amah phatsanna ang hialah a ngai.

Laporta-a'n Xavi be miah loin coach dang a zawng nghal a, Xavi thusawia lungawi lo hle e, ti lo chuan Xavi hi insawifiah tur pawhin a be eih lo - a tawpah chuan an inban a, Xavi-a'n Barca a enkawl dawn ta lo.

Dawhthei la

Xavi chuan coach thar tur tan thuchah siamin, "He hmuna awm hi a danglam khawp mai - he club enkawl hi hna hautak em em a ni a, dawhtheih a ngai a ni," a ti a, amah thlaktu tur tan thil tam tak a harsat tur thu a sawi.

Player a nih laia Barcelona tana Champions League nomawi vawi li chawitu chuan, "He club-a kum hnih leh a chanve chhunga ka thil tih tam tak khan he hmun hi a sawinghing ni berin ka hria a, vawi tam tak chu bitum ka lo ni tawh," a ti!

Xavi chuan duhthlan tur a neih chuan loh thu sawi zuiin, "Min banna chu ka pawm mai a ngai a, min ban chhan an sawite ka pawm leh pawm lohin awmzia a nei phak lo. Barcelona enkawl hi a harsa takzet.

"Kar liam ta kha hrehawm ti takin ka hmang a, mahse, ka rilruah erawh ka fim em em - he club-a ka hnathawh hi ka chhuang a, ka hlim em em a ni," a ti a, Barca-a a hnathawhah a lawm tawk thu a sawi.

A rei lua e

Barca hian Flick an la lut ngei dawn tih chiang tawh mah se, he thu buatsaih a nih thleng hian an coach tur hi an la puangzar thei lo - Xavi nen chinfel tur an la neih vang niin Spanish media-te chuan an tarlang.

Catalan club hian Xavi hi an ban avangin kum khat contract a la neiha a hlawh tur chu an pek tlak tho a ngai a, hei hi pe tla loa inrem theih dan tur an dap mek!

Barca sporting director Deco leh Xavi agent Fernando Solanas te chu an indawr mek nia sawi a ni a, Catalan sum dinhmun a ṭhat loh miau avangin financial fair play dan an bawhchhiat loh dan tur ngaihtuah a ngai tel bawk.

Hetihlai hian Xavi chuan a hmaah hnathawh tur a inchhawp a nih chuan a ngaihtuah tur thu a sawi a, hetihrual hian chawlh hahdam mamawha a inhriat thu erawh a sawi tel tho.