Aston Villa-ah Emery a rinawm

Champions League khel tura Aston Villa hruai kaitu, manager Unai Emery chuan kum nga dang Villa Park-a cham turin contract thar a ziak a, kum 2029 thleng English club hi a enkawl dawn.

Kum 52 mi manager hian October 2022 khan Villarreal chhuahsanin, Villa hi a zawm a, hetihlai hian Premier League table-ah 17-na an ni a, pasarihna ni chungin season a kharpui.

Emery hian season hman zawh tak kha season tluana Villa a enkawl hmasak ber niin, palina a nihpui a, season tharah Champions League an khel dawn.

Spanish coach chuan, "Contract thar ziak a, he club ka enkawl zel thei tur hi ka lawm takzet. Aston Villa-ah hi chuan inpawhna danglam tak a awm a, fan-te min thlawpna hian mahni ina awm ang maiah min siam bawk.

"Beiseina sang tak nei reng chunga he club kan enkawl zel thei tur hi ka lawm hle," a ti - Emery hian kum thum dang contract a la nei sa a, season khatah pound maktaduai riat dawn a hlawh dawn niin an sawi a, £2mtd-in a hlawh a pung.

Sevilla leh Arsenal pawh lo enkawl tawh Emery hian kum 13 hnua a vawi khat nan season hman zawh takah khan Villa chu European football a khelhpui a, an inlanna erawh Europa Conference League niin, semifinal a hruai thleng.

Villa chairman Nassef Sawiris chuan, "Unai hoin Villa-ah hian thil ropui tak din turin theihtawp kan chhuah ho a, kum 2029 thleng cham tura contract thar a ziak hi ka lawm hle. Kan club kum 150-na kan hnaih ta hle a, Unai hoin hmabak êng tak thlir tur kan nei a ni," a ti a, Emery an chelh thei chu a lawm.

Emery hian Sevilla a enkawl laiin season thum chu a zawnin Europa League nomawi a chawipui a, Villarreal a champion pui tawh a, Arsenal chu final a hruai thleng tawh bawk. Paris Saint-Germain pawh enkawl tawhin, Ligue 1, Coupe de France (2), Coupe de la Ligue (2) leh Trophée des Champions (2) nomawi a chawipui tawh a ni.