Belgium-in Courtois an telh lo

Belgium-in Euro 2024 khel tur squad an puang a, Real Madrid goalkeeper Thibaut Courtois a tel lo. Courtois hi nikum August khan a khupah hliam a tuar a, zai a nih avangin tun season-ah pawh Real Madrid tan match liah chauh a inlan.

Chutihrualin Courtois hi a dam tawh a, Champions League final khel turin pawhin a hming sawi rik a awm hial. Tun ṭuma koh a nih loh chhan hi coach Domenico Tedesco nen an inhmuh thiam loh vang a ni thei.

Nikum khan Eden Hazard-a'n football khelh a chawlhsan a, captain atana ruat loh Courtois-a'n Belgium camp a chhuahsan. Tedesco-a'n a khup hliam vanga chhuak a nih thu sawi mah se Real Madrid goalkeeper hi a lungawi lo nia ngaih a ni.

Tedesco chuan, "Courtois-a'n ama dinhmun a hre ber a, Euro khel tura a taksa a inpeih loh thu min hrilh," tiin a sawi. Courtois-a'n ram tana a khelh hnuhnun ber chu June 17, 2023 a ni a, kum 32 mi a nih tawh avangin ram tan a khel zel ang em tih pawh a chiang ta lo.

Euro 2024 khel turin player 26 koh theih mah se Tedesco hian player 25 chauh a ko a, koh zingah Man City midfielder Kevin de Bruyne leh winger Jeremy Doku te an tel a ni.