Box Office: 'Garfield' leh 'Furiosa' an inum

North American box office-ah Anya Taylor-Joy channa, 'Furiosa: A Mad Max Saga' leh animated movie 'The Garfield Movie' an inum a, 'Furiosa' hian no. 1 dinhmun a hauh pha hram.

George Miller-a post-apocalyptic film,'Furiosa' hian USD mtd. 25.6 la lutin, Chriss Pratt-a'n aw a thawhna, 'The Garfield Movie' hian USD mtd. 24.8 a la lut bawk a, an inhnaih hle.

'Furiosa' hi no. 1 ni mah se, Memorial Day weekend-a debut zingah chuan kum 29 chhunga sum la lut tlem ber a ni. International-a a sum lak luh hi USD mtd. 33.3 niin, khawvel huapa a sum hmuh hi USD mtd. 58.9 a tling. Hetih lai hian budget hi USD mtd. 168 zet a nih avangin hlawkna tel tur chuan hmabak a la ko hle. Critics review a hmu ṭha a, Rotten Tomatoes-ah 89% rating a hmu a, mahse, audience lam erawhin CinemaScore-ah 'B+' chauh an pe thung.

'Garfield' hi USD mtd. 60 senga siam niin, international-a a sum hmuh USD mtd. 66.3 nen a vaiin USD mtd. 98.1 a hai lut der tawh thung. 'IF' chu a kar hnihnaah no. 3-ah tla thlain, USD mtd. 16.1 a lak luh belh leh. 'Kingdom of the Planet of the Apes' pawh no. 4-ah awmin USD mtd. 13.3 a hmuh belh leh a, USD mtd 5.9 la luttu 'The Fall Guy' chuan Top 5 a rawn khar.