PVL Final : Luangmual hmaah Diakkawn

Ather Pro Volleyball League 2024 hmeichhe final chu zanin dar 8:00 hian LPS Arena, Falkland Vengah khelh a ni dawn, champion lai Luangmual leh season hmang ṭha tak Diakkawn ten a thiam ber nih an inchuh dawn a ni.

Final hi a hmunah en theih a ni a, TV lamah LPS-in an pek chhuah bakah man chawiin YouTube kaltlanga en theih a ni bawk. A hmuna en duh tan kal hma a finthlak ang, hall chhunga ṭhu tawk bak ticket pek chhuah a ni dawn lo.

Tun season PVL hmeichhe inelna huangah chuan team pahnih hi a ṭha leh hmuhnawm an ni. Tun thla tir khan league round lamah an lo intawng tawh a, inkhel inhnehtawk leh hmuhnawm takah Luangmual hi 15-13, 16-14, 8-15, 15-10, 8-15 (3-2) in an chak.

Diakkawn coach R. Lallenmawia chuan, "PVL chauh a ni lo a, nikum MVA Cup final-ah kan intawng tawh bawk a, a chak lo zawkah kan ṭang ve ve. Tun ṭumah chuan a chak zawk nih ve ngei kan tum dawn tawh a ni, chumi tur chuan theihtawp kan chhuah ang.

"Vardingliani tan match hnuhnung a ni dawn a, ani vang pawh hian chak kan duhna a sang zual hle a ni," tiin Vanglaini a hrilh. India senior team tana Mizo khel thei awmchhun Vari hi player ṭangkai a la ni a, zaninah pawh a tawnhriat neih tawhte a ṭangkaiin a rinawm.

Vari thlawp turin Lalmuanpuii an nei a, Muani hi tun season PVL player hmuhnawm leh ṭangkai a ni ṭhin, anni pahnih an khelh fuh ṭum a nih bakah player dang ten an thlawp ṭhat chuan Luangmual hneh turin theihna an nei.

Luangmual lamin an nomawi hloh mai an tum bik lo. Coach Jessie Lalpianpuia chuan, "Diakkawn hian player an nei ṭha em em a, keini aiin tawnhriat pawh an nei ṭha zawk, chuvangin hmachhawn an harsa dawn tih hi chu kan hre lawk.

"Theihtawpin kan inbuatsaih a, kan inzirna te Pathianin mal a sawm a nih chuan champion leh ngei pawh kan tum. Champion lai ni mah ila game hi chu sawilawk a harsa," tiin Vanglaini a hrilh a, champion turin a naute a ringtawk tih a sawi bawk a ni.