TNT hnehin Tuichangral an tlang

Thutak Nunpuitu Team (TNT) a ṭang zo lo a, an nomawi kawl lai chu midang kuta an hlan a ngai dawn ta. Ather Pro Volleyball League 2024 mipa semifinal-ah TNT hian Tuichangral an ngam lo a, final lut phak loin a zinkawng a tawp.

Thawhlehni zan LPS Arena, Falkland Venga semifinal inkhelah Tuichangral hi 25-23, 25-13, 25-18 (3-0) in an chak, league round an intawn hmasakah chak lo zawk ni mah se chiang takin an tho chhuak a, final an khel dawn a ni.

Semifinal hmasa zawkah Hunthar chuan Chhinga Veng Spikers an lo hneh tawh a, tualchhung volleyball inelna lian leh ngaihhlutah Hunthar leh Tuichangral ten May 31, Zirtawpni zan hian a thiam ber nih an inchuh ang.

Set khatnaah team pahnih an inbei tawk hle, a tawpa an inthlauhna chu point hnih chauh a ni. Tuichangral hian hun pawimawh laiah point an hmu thei zawk a, an chak theih nana point 17 hlak chhuaktu Zomuansanga chu Kuriz Player of the Match atan thlan a ni.

Tuichangral tan Zomuana bakah state pawn aṭanga chah luh Sonu-a (12), Saidingpuia Sailo (11) leh Vanlalṭanpuia (10) ten point 10 an nei tling a, mimala cheṭha fal tak sawi tur awm lem lo mah se team thawhona ṭha chu an chakpui.

Thutak Nunpuitu Team erawhin season hmasa an brouak an phak lo tluan. Tournament ṭan hma deuhin Vanlalṭanchhana a damlo a, inelna neih hunah Valbuanga hi dam tawh mah se nikum angin an khel chhuak ṭha hleithei tlat lo.

Kawnpui tlangval Valbuanga hian Tuichangral lakah point 20 lai neiin a nei tam ber a, vawi sarih a tisual thung. TNT player zingah point sarih neitu Zosangzaula chu Valbuanga hnaih bertu a ni a, midangin point neih an harsat.

Nikum khan Mizo hlanga khel chungin PVL nomawi an chawi a, tualchhung player hlanga champion thei hmasa ber an ni. Kuminah Mizo hlang bawkin an khel a, theihna nei sang leh thiam tak tak la ni mah se hlawhtlin nawn erawh a harsa.