Champion lai Djokovic a chak

French Open champion lai a ni a, world number 1 a ni bawk - tun hnaiah a khelh ṭhat loh avang erawh chuan rin ngam a harsa. Inelna an ṭan a, a thiam erawh a la theihnghilh lo, a khingpui Pierre-Hugues Herbert chu 6-4, 7-6 (7-3), 6-4 in a hneh.

Kum 37 mi Djokovic hi awlsam taka chak erawh a ni bik lo, tualchhung tlangval hneh tur hian darkar hnih leh minute 31 chhung hun a hmang a, a khingpuiin service a neih ṭhat avangin hun ṭhenkhat laiah chuan a talbuai ve teuh thei hle.

Serbian star hian season kal laiah nomawi a la chawi lo, tournament a khelh hoah final luhna a la nei lo hial bawk. Kar hmasa khan inbuatsaih nan Geneva Open a khel a, inelna ne, deuh zawkah pawh final a lut phak lo a ni.

Grand Slam vawi 24 champion tawh Djokovic chuan, "Pierre khan a service ṭha thei em em a, a bik takin set hnihnaah khan a tiṭha zual. Lo dawnsawn dan tur kha ka ngaihtuah buai rei hle.

"Kar hmasa lama ka match khelh nena khaikhin chuan hmasawnna hmuh tur tam tak a awm, major tournament match hmasa ber hi chu a harsa ṭhin a, tunah chuan inrintawkna pawh ka neih belh leh ta," a ti.

Djokovic hian a match lehpekah chuan world number 63 Roberto Carballes Baena a hmachhawn ang. Major title lak hnem lama amah hnaih bertu Rafael Nadal (22 titles) a ta fel tawh a, a champion leh a nih chuan a kal fal tawh khawp ang.

Inkhel dangah Casper Ruud pawh a chak - French Open final vawi hnih khel tawh Ruud hian Felipe Meligeni Alves chu 6-3, 6-4, 6-3 in a hneh a, a vawi khat nana Grand Slam champion a tumna kawngah bul a ṭan fuh hle.

Norway tlangval Ruud hian French Open 2022 final-ah khan Nadal a ngam lo a, season hmasa khan Djokovic a ngam lo bawk; kuminah hian seeded pasarihna pek a ni a, clay court hi a inkhelh thiamna hmun a nih avangin thleng sang leh tura rin a ni.

Kum 25 mi Ruud chuan, "Ka tan season ṭha tak a ni mekah ka ngai, tun hnai season hnih chhungin French Open-ah hian tawnhriat ka ngah em em a, chu chuan inrintawkna sang tak min siamsak bawk, ṭha taka ka khelh chhunzawm theih pawh ka beisei," a ti.

Mipa inkhel dangah Australian tlangval Alex de Minaur chuan American player Alex Michelsen chu 6-1, 6-0, 6-2 in a hneh ve bawk. Seeded 11-na De Minaur hian second round-ah chuan seeded ni phak lo Alex de Minaur a hmachhawn leh thung dawn a ni.

French Open hmeichhe inelna lamah Elena Rybakina chuan Greet Minnen chu 6-2, 6-3 a hnehin second round a lut, hnehna chang tur hian darkar khat leh minute 13 bak hun a mamawh lo; a match lehpekah chuan Angelique Kerber hnehtu Arantxa Rus a hmachhawn ang.

Champion tura rinkai zinga mi Aryna Sabalenka tan pawh harsatna a awm lo - seeded pahnihna Sabalenka hian tleirawl Erika Andreeva lakah game thum chauh a hloh a, nuamsa tak 6-1, 6-2 a chakin first round a paltlang ve bawk a ni.