Timberwolves an chak ve leh phawt

Dallas Mavericks tan NBA Finals luh tlang nghal ngawt a la theih bik loh. Nimin zing Western Conference Finals game 4 inkhelah Minnesota Timberwolves chuan Mavericks hi 105-100 in an hneh.

Game hmasa pathumah Mavericks hi an chak vek a, chak leh ni se la chuan best of seven series la thei dinhmunah an ding. Mahse, Timberwolves an chak leh tak avangin Mavericks hi 3-1 in an chungnung rih.

NBA Finals lut tur chuan a tlem berah game 4 tal an lak a ngai. May 31, Zirtawpni zing dar 6:00 hian Targen Center-ah game 5 an khel leh dawn, a chak zawkin Boston Celtics nen NBA champion nih an inchuh leh bawk ang.

Minnesota Timberwolves tan Anthony Edwards chuan point 29 neiin an chak theih nan a thawhhlawk hle a, point 25 neitu Karl-Anthony Towns pawh sulsutu pawimawh zinga mi a ni bawk.

Edwards chuan, "Basketball ka khel ve nual tawh a, playoff chinah hian game la miah loa tlawm hi ka la nei ngai lo, chumi thlen tir lo tur chuan theihtawp kan chhuah takmeuh a, a rah chhuah pawh kan hmu.

"Game khat atan hnehna kan chang thei a nih chuan a lehpekah pawh kan chak leh thei ang, chumi rilru chu kan pu chhunzawm tur pawh a ni ang," tiin an la tlawm mai dawn bik lo tih a sawi.

Mavericks head coach Jason Kidd pawhin a naute a ringtawk tih a sawi a, regular season ṭha taka an hman tawh bakah playoff china an game hmuhnawm ang chu neih leh theih ngei a beisei thu a sawi bawk.