La Liga player ṭha ber Jude Bellingham

Real Madrid midfielder Jude Bellingham chu La Liga-a a season hmasa berah Player of the season atan thlan a ni nghal a, England international hian Spain-ah insiamrem turin hun a mamawh ve lo.

Borussia Dortmund midfielder hlui Bellingham hi season hmasa lawk khan Bundesliga Player of the season atan thlan a lo ni tawh a, kum 20 mi lek ni chungin ram pahnih league-ah player of the season a ni tawh tihna a ni - a nep lo hle.

England tan vawi 29 inlana goal thum khungtu Bellingham hian award dawng tur hian Real tana a khelhpui Vinicius Jr, Antoine Griezmann (Atletico Madrid), Artem Dovbyk (Girona) leh Robert Lewandowski (Barcelona) te a khum.

Bellingham hi Euro 2024 khel tura koh England squad-ah telh a ni a, amah vangin Three Lions hian rin an hlawh phah nasa ang. Mahse, Euro khel tura a fehchhuah hmain Champions League final-ah Dortmund a hmachhawn leh phawt ang.

Sulhnu ropui

June 2023 khan Bellingham hian Real Madrid hi Dortmund aṭangin a zawm a, a man hi euro maktaduai 103 niin, a khelh ṭhat dan a zira €133.9mtd thlenga sang chho thei tur a ni - a khel ṭha miau a, a man hi a pun belh a rinawm.

Bellingham hian Real-a a season hmasa berah match 41 khel tawhin, goal 23 a khung a, assist vawi 12 a nei bawk. La Liga bikah goal 19 leh assist vawi ruk neiin a team a champion pui.

Champions League-ah pawh Real hi champion thei dinhmunah an ding mek a, he inelnaah pawh hian Bellingham hian match 10 khelin goal li a khung a, assist vawi li a nei bawk.

English midfielder hi Real-a a season hmasa berah nomawi pahnih chawi thei dinhmunah a ding mek tihna a ni. La Liga a champion tawh a, June 1 zanah a club hlui Borussia Dortmund nen Champions League final an khel ang.

Ka lawm e

Bellingham chuan, "Ka award dawn hi ka khelhpui te, coaching staff leh a pawimawh berah chuan khawvela club ṭha ber ṭantu, kan fan-te tan ka hlan," a ti a, award semna hi Champions League final khel tura inbuatsaih a ṭul avangin a chhim thei lo thung.

English midfielder chuan Real tana a khel thei chu a lawm thu sawi zuiin, "He team tana ka inkhelh apiang hian ka lawm em em ṭhin - Hala Madrid," a ti a, a club khelh mekna fan-te lawm zawng sawi a thiam hle.

Bellingham hi kum 20 chauh la ni mah se, mimal lawmman dawn lamah a mikhual lo hle. Nikum khan FIFA FIFPRO Men's World 11-ah meuh a lo lang tawh a, La Liga team of the season-ah thlan tel a ni bawk.

Real-ah Vinicius leh Rodrygo bakah Kylian Mbappe chuan a belh dawn nia sawi a ni a, season thara Real team tur hi hmuh an châkawm tawh hle - anmahni enkawl turin coach Carlo Ancelotti an la nei cheu!

Khum takte

Bellingham-a'n player ṭha bera thlan a phu a, a khum tak player-te pawh he award dawn phu tak vek an ni. Real tana a khelhpui Vinicius hian tun season inelna hrang hrangah match 38 khela goal 23 khungin assist vawi 11 a nei.

La Liga bikah match 26 khela goal 15 khungin, assist vawi ruk a nei a, league nomawi an chawi theih nana player thawhhlawk a ni. Atletico-in Champions League khel phak ṭawk mah se, Griezmann-a season hman dan hmuh kân theih a ni lo.

Kum 33 mi forward hian La Liga-ah match 33 khela goal 16 khungin, assist vawi ruk a nei a, inelna hrang hrangah match 48 khelin goal 24 a khung a, assist vawi riat a nei. Girona forward Dovbyk mawlh hi - league match 36-ah goal 24 a khung a, assist vawi riat a nei.

Tun season-a Girona pantu forward hi La Liga-ah top scorer a ni a, Spanish top flight league-a a season hmasa ber a hmang chhe lo. Lewy pawh kum 35 ni tawh mah se, nominee zingah a lang ve - league match 35-ah goal 19 leh assist vawi riat a nei a, inelna hrang hrangah match 49 khelin, goal 26 leh assist vawi kua a la nei thei.

A hming Yamal

La Liga Awards-ah hian Best Under-23 player thlan a ni bawk a, Barcelona tana season duhawm tak hmangtu, kum 16 mi forward Lamine Yamal chu thlan a ni - tun season-ah league match 37 khelin goal nga a khung a, assist vawi riat a nei.

Euro 2024 khel tur Spain squad-a awm Yamal hian inelna hrang hrangah match 50 a khel tling a, goal sarih a khung bakah assist vawi 10 a nei bawk - a kum zat ngaihtuahin a khelh zat hi a tam hle.

Coach ṭha ber atan Michel Sánchez chu thlan a ni a, Girona coach a ni - Michel hian Girona chu league-ah pathumna a nihpui a, an club chanchina a vawi khat nan Champions League an khel dawn.

Michel hian Rayo Vallecano leh Huesca chu segunda division nomawi a lo chawipui tawh a, Manchester City-a Pep Guardiola thlak turin tam tak chuan an sawi ri. Osasuna defender Jesus Areso chuan Getafe laka a goal mawi avangin goal of the season award a hum haw ve bawk.