T20 Cricket World Cup: Ni thum chiah a awm ta

2024 ICC Men's T20 World Cup chu June 2, Pathianni zing aṭangin khelh ṭan a ni dawn. Cricket khawmpui lian hi United States leh Canada-ah nghah a ni dawn a, inelna ṭan nan ni thum chiah a awm tawh.

Pathianni zing dar 6:00-ah United States leh Canada te an inkhel ang a, zan dar 8:00-ah West Indies leh Papua New Guinea te an inkhel thung ang. Tun ṭum inelnaah hian team 20 an tel a, June 2 - June 29, 2024 chhungin match 55 an khel ang.

Team 12 awm lai

T20 World Cup hmasa ber hi kum 2007 khan khelh ṭan a ni a, South Africa chu a thlengtu niin India an champion. Hemi ṭum hian team 12 chu group paliah team pathum zelin an ṭhen.

Group tin aṭangin a sang pahnih ṭheuh chu Super 8 khel turin an tling a, Super 8-ah hian team pariat chu group hnihah ṭhen leh an ni. Group hnih aṭangin a sang pahnihin semifinal an lut leh bawk.

Kum 2009-a inelna vawi hnihna England-a neih a nih pawh khan team 12 tho an tel a, Pakistan an champion. Kum 2010 khan West Indies-ah inelna hi neih lehnghal a ni a, England-in nomawi an chawi. Kum 2012 khan Sri Lanka-ah neih a ni a, West Indies chu pakhatna an ni. Kum 2014-ah Bangladesh-ah inelna nghah a ni a, Sri Lanka an champion.

England, West Indies leh Sri Lanka te hi an rama nghah zawh chiah kumah vek an champion. Kum 2012 thleng inelnaah team 12 an tel a, inelna kalphung pawh a ngai zel. Kum 2014-a Bangladesh thlen kum aṭangin team 16 an tel ṭan.

Team 16 awm hnu

Team 16 awm hnuah inelna kalphung pawh a danglam. Super 10-ah team ṭha pariat an lut sa a, pariat dang chu group pahnihah ṭhendarh niin a sang ber ve ve chu Super 10 khel turin an tling.

Super 10-ah hian team 10 chu group hnihah team panga ve vein ṭhen an ni a, vawi khat ṭheuh inkhelh chhuah hnuah a sang pahnihin semifinal an lut.

Kum 2016 khan India-in inelna an thleng ve thung a, team 16 niin inelna kalphung pawh a la ngai. West Indies an champion a, final-ah England an hneh. Kum 2021 khan inelna hi neih leh a ni a, Oman leh United Arab Emirates ten an thleng.

Team 16 thoin inelna hmachhawn mah se inelna kalphung a danglam hret. Group stage-ah team pariat chu group pahnih ve veah ṭhen ni mah se group khata a sang ber chauh ni loin a sang pahnihin final Super 12 an lut. Team 12 an nih tawh avangin Super 10 ni loin Super 12 tih a ni tawh zawk.

Kum 2021 hian final-ah Australia-in New Zealand hnehin an champion. Kum 2022-ah inelna hi neih lehnghal a ni a, team 16 bawk telin inlena kalphung pawh a ngai. England an champion a, tun ṭumah pawh hian champion lai an ni.

Kalphung thar

Kuminah team 20 an tel dawn a, kalphung pawh a danglam leh hret. Team zawng zawngin first round aṭangin an khel dawn. Team 20 hi group paliah panga ṭheuhin semdarh an ni a, a sang pahnihin Super 8 an lut dawn.

Group A-ah India, Pakistan, Canada, Ireland leh United States te an awm a, India leh Pakistan inkhel tur hian ngaihven a hlawh dawn. Chutihrualin an group aṭangin anni pahnih hi awlsam taka Super 8 lut tura ngaih an ni.

Group B-ah England, Australia, Namibia, Scotland leh Oman te an awm a, inelna hnuhnung pahniha champion England leh Australia te khing zo tur dang an awm lo. Group C-ah New Zealand, West Indies, Afghanistan, Papua New Guinea leh Uganda te an awm. Team ṭha pathum an awm tak avangin Super 8 lut tur hriatthiam a har.

Group D-ah South Africa, Sri Lanka, Bangladesh, Nepal leh Netherlands te an awm a, Nepal leh Netherlands te hi nem deuh tura ngaih an ni. Team dang pathum hi chu inhneh tawn thei vek an nih avangin result danglam deuh pawh a thleng thei ang.

Engtin zel?

Group tin aṭanga a sang pahnih ṭheuhin Super 8 an lut dawn a, team pariat hi group hnihah ṭhendarh an ni dawn. Vawi khat ṭheuh an inkhel kual ang a, group pahniha sang pahnih ve vein semifinal an lut leh ang.

Super 8 hi June 19-23 chhungin khelh zawh a ni ang a, semifinal hi June 26-27, 2024-ah khelh a ni dawn. Final hi Kensington Oval, Bridgetown, Barbados-ah June 29, 2024-ah khelh a ni ang.

T20 World Cup hi India ramah chuan Star Sports kaltlangin a en theih dawn. Tun ṭum inelnaah hian ambassador atan T20 WC champion tawh Yuvraj Singh, Chris Gayle leh Shahid Afridi bakah Jamaican sprinter Usain Bolt te an hmang.

Inelna neihna hmun

Inelna hi West Indies leh United States-ah khelh a ni dawn. United States-ah hian khawpui pathum Florida, New York leh Texas-ah te khelh a ni dawn. Opening match khelhna tur Grand Prairie Stadium (Texas)-ah hian entu 15,000 an leng.

Group stage-a ngaihven hlawh ber tur India leh Pakistan te inkhel a ni a, Nassau County International Cricket Stadium (New York)-ah khelh a ni ang. Stadium-ah hian entu 34,000 an leng a, tun ṭum World Cup khelhna tur stadium zinga mipui len tamna ber a ni.

West Indies-ah hian khawpui paruk Antigua & Barbuda, Barbados, Guyana, Saint Lucia, St. Vincent & the Grenadines leh Trinidad & Tobago-ah te khelh a ni dawn bawk. Final khelhna tur Kensington Oval (Barbados)-ah hian entu 28,000 an leng.