Borussia Dortmund: Champion ve thei an ni em?

UEFA Champions League final chu May 1, Inrinni zan dar 12:30 hian Wembley Stadium-ah Real Madrid leh Borussia Dortmund ten an khel dawn. European champion vawi 14 zet ni tawh Spanish club hi champion tura rinkai an ni a, chutihrualin last 16 aṭanga team tum châkawm zinga mi Dortmund hian mak takin Wembley Stadium an thleng.

Bundesliga khelh zawh takah pawh Dortmund hi pangana chauh an ni a, mahse UCL final an thleng miau si. Chutihrualin 1996-97 season khan Dortmund hian Zinedine Zidane, Alessandro del Piero leh Christian Vieri te awmna Juventus hnehin an champion tawh. 2012–13 season khan tun ṭuma final khelhna tur Wembley Stadium-ah hian UCL final an khel tawh a, Bayern Munich lakah 2-1 in an vanduai thung.

Tawnhriat ṭha

Kum 11 liam ta khan Jurgen Klopp kaihhruai Dortmund chu Wembley Stadium-ah rilru na zawkah an ṭang tawh a, tun ṭumah hian Klopp chu awm tawh lo mah se khami ṭuma star player Marco Reus a la awm.

Reus bakah Mats Hummels te chuan kum 2012 final-ah hian bul an ṭan a, an hun tawn kha tun ṭuma an khelhpuite hi an hrilh let thei ang. Bayern-in minute 89-naa Arjen Robben goal hmangin hnehna an chang hram a, vanneih ṭum ni se champion thei tih an inhrechiang khawp ang.

Final khelhna tur stadium-ah hian FA Cup final pawh khelh a ni a, Manchester United-in an hmelma leh tun laia team ṭha bera chhal ngam Manchester City an hneh thei a, hei hi Dortmund tan infuihna ṭha tak tur a ni.

Reus a thlahna

Borussia Dortmund hming lam rik chuan Marco Reus hming a ri tel nghal a ni ber. Reus hian season tawp rualin Signal Iduna Park a chhuahsan tur thu a tichiang. A vanglai hun zawng zawng Dortmund-ah Reus hian a hmang zo a, club-in an legend an thlah theih dan ṭha ber chu European champion nomawi a ni.

Reus hian Dortmund tana khelh tam lamah Hummels, Michael Zorc (1981–1998) leh Roman Weidenfeller (2002-2018) te chauh a tluk lo. Goal khung tam lamah Reus hian goal 177 khungtu Adi Preissler chauh a tluk lo a, goal sarih chauhin a pha lo. Hliamin Reus hi tibuai lo se, khelh tam leh goal khung tam lamah record a siam ve ve ang.

Heti khawp hian club tan Reus hian sulhnu nei ṭha mah se nomawi chawi a harsat. Bundesliga a zawna vawi hnih an champion zawh chiaha Dortmund zawm a nih avangin DFB Pokal pahnih chauh chu a nomawi chawi a ni mai a, European champion an nihpui theih chuan Reus hian sulhnu a thlirkir hunah a nui ve thei ang.

An zuam sual fo

Borussia Dortmund hi group stage-ah PSG, Milan leh Newcastle United nen group khatah an awm a, a tawpah chuan an group-ah pakhatna an ni daih. Knockout-ah Dortmund hian PSV hnehin bul anṭan a, hetah hi chuan rinkai zawk a ni.

Mahse, quarterfinal-ah Atletico Madrid lakah first leg-ah 2-1 in an chak lo a, second leg-ah 4-2 in an tho chhuak. Diego Simeone hote lakah match hnih chhungin goal nga an khung thei a, Real Madrid pawhin an hmelma club laka goal nga a khung theih avang ringawt pawh hian an fimkhur lehzual phah phei ang.

Semifinal-ah Dortmund hi PSG nen an inhmachhawn leh a, Kylian Mbappe awmna team lakah goal an chhuah lo a, first leg leh second leg-ah 1-0 a chak ve vein aggregate-ah 2-0 in an chak. An khingpui team thlirin final hial an thleng hi vanneih vang ngawt chu a ni ta lo.

Tlarhnung khawng ṭha

Dortmund-in tun dinhmun a thlen theihna chhan chu an tlarhnung khawng ṭhat vang a ni a, tun ṭum inelnaah hian vawi ruk ngawt goal chhuah lohna match an nei. PSG hian Dortmund an hmachhawn hmain match 10-ah goal 19 an khung thei a, mahse Signal Iduna Park leh Parc des Princes-ah an khung thei lo ve ve.

Germany-in Euro 2024 khel turin ko lo mah se Hummels-a'n a ṭhatzia a la pholang a, a bula ding Nico Schlotterbeck hmuh hmaih a thiang lo. Hummels leh Schlotterbeck te hi an inkawp fuh a, wing back pahnih Ian Maatsen leh Julian Ryerson te hi an rintlak viau bawk. Maatsen hi loan hmanga Chelsea aṭanga an hawh a ni a, kum 22 mi chauh la ni bawk mah se final kalkawngah Dutch defender hi a pawimawh. Kum 26 mi Ryerson hian Union Berlin aṭangin Dortmund hi a zawm a, kumin hi season hnih a khelhna a ni.

Goalkeeper Gregor Kobel hian UCL-ah save 42 a nei tawh a, tun season Europe inelna sang bera save ngah ber a ni. Chutihrualin an khingpui tur hi Jude Bellingham, Vinicius Junior leh Rodrygo te an ni dawn a, Real tlarhma dang chat tur chuan an chet ṭhat lehzual a ṭul khawp ang.

Tlarhma an inpeih

Manchester United-ah Jadon Sancho-a'n kawhmawh a bawl a, Erik Ten Hag-a'n a hrem. English winger hi a hming chherna club Dortmund-ah kirin a thiam thil a la theihnghilh lo a, PSG defender lakah pawh a la tal ngap hle. Sancho hian Wembley Stadium-ah ngainatu an ngah dawn a, Real Madrid lakah England manager Gareth Southgate-a inchhirna tur ngeia khelh a duh ang.

Dortmund-ah Sancho hi che ṭha mah se season chanve hmalamah Man United-in an chhawr mumal miau loh avangin Southgate-a'n a ko lo a, UCL final meuh khel thei player hian England kawr a ha dawn lo. Sancho bakah hian Donyell Malen, Karim Adeyemi, Reus leh Julian Brandt te an awm a, an khelh ṭhat ṭum chuan Real tana hnawksak thei an ni dawn.

Chutihrualin Dortmund hian Germany no. 9 Niclas Fullkrug an kawl tih a hriat a ṭha a, ani chu upat hnua ṭha choh a nih avangin a naupan lai chanchin sawi tur a ngah ve lo. Mahse, uaiin ṭha mi ang maiin kum 31 mi a nih hnuah Europe striker ṭha zingah a tel pha tlat. Fullkrug hian PSG lakah goal ṭha bik a khung a, semifinal-a a goal khung hmutute chuan a finishing ṭhatzia an hria ang. Real Madrid tlarhnung innghahna Antonio Rudiger hi Fullkrug nena Germany nena khel dun an ni a, Rudiger hian Erling Haaland ang em emin Fullkrug hi a ven uluk rinawm lo mah se a thlah thlam hauh lo ang.