Chelsea coach thar tur Enzo Maresca

Mauricio Pochettino-a'n Chelsea a chhuahsan hnuah London club-in Argentine coach thlaktu tur an zawng reng a, an duh an hmu ta - Leicester City manager Enzo Maresca chuan Blues a enkawl dawn a, he thuziak i chhiar meuh chuan official-in an puangzar tawh hial mai thei.

Blues hian a tirah chuan Ipswich Town manager Kieran McKenna an dawr hmasa ber a, mahse, McKenna nen an inrem theih loh hnuah Maresca lam an hawi - Brighton & Hove Albion manager Roberto de Zerbi leh Brentford boss Thomas Frank pawh an thlithlai pah tho.

Mahse, Maresca leh Chelsea an inrem thei ta a, coach zawn chu an chawlhsan tawh rih dawn. Football journalist lar Fabrizio Romano chuan Maresca hian Blues-ah contract a ziah ngei tur thu a tarlang tawh a, June 2029 thleng cham turin a ziak ang.

Maresca hi Leicester lama a coaching staff panga velin an zui dawn a, Foxes hian a tlem berah an coach manah hian pound maktaduai riat vel an phut bawk - he thuziak i chhiar meuh chuan a man zat pawh a chiang tawh hial mai thei.

Tu nge Maresca?

Chelsea-in hmachhawp thui tak an nei a, squad naupang tak an kawl bawk avangin coach naupang lam an duh - Italian coach Maresca hi kum 44 mi chauh a la ni a, hei hi Chelsea-in an duh chhan niin a lang.

Maresca hian Italian second division club Ascoli aṭanga a coaching career zawh ṭanin, kum 2017 khan assistant coach a ni. August 2020-ah Manchester City academy zawmin, Under-23 chu a season hmasa berah Premier League 2-ah nomawi a chawipui.

City U23 a champion pui hnu hian Serie B club Parma a zawm a, mahse, player langsar Gianluigi Buffon leh Franco Vázquez te a nei chungin playoff takngial pawh a thlenpui phak lo a, kum chanve pawh tling loah an ban.

June 2022 khan City-ah bawk a kir a, Pep Guardiola hnuaiah assistant coach a ni. Season hmasa ṭan dawnah Leicester a zawm a, Premier League aṭanga tla hlim Foxes hi season khat bak Championship-ah hun a hmanpui lo - English second division champion a nihpui a, Premier League-ah a hruai kir.

Maresca kher!

Chelsea-in a tirah coach pali hming an chhawp a, an hming chhawpchhuah zingah sporting director pahnih Paul Winstanley leh Laurence Stewart te chuan Maresca hi an duh ber a, an thur chhuak leh nalh.

London club neitu zinga mi Behdad Eghbali chu coach ṭha tak an neih theih nan a thawkrim hle a, London-ah coach zawn chhung chu a awm reng niin an sawi. Blues hian an coach rawih tur hi data hmangin uluk takin an teh a, interview an neihpui a, coach palite hnathawh dan an thlirkir vek bawk.

Blues thuneitute chuan Maresca hian an club kalphung a rem berin an ring a, an squad-a player ṭhenkhat nen an inhriat sa avangin chu chu a buk tirittuah an hmang bawk. Pep-a assistant a lo nih tawhna chu an dahsan chhan a ni tel.

Chelsea hian Arsenal-a che ṭha tak, City-a Pep-a assistant hlui tho Mikel Arteta hlawhtlinna chu Maresca teh nan an hmang tel a, Arteta ang bawkin Maresca hian Chelsea hi team hmuhnawm taka a chhuah theih an beisei.