FA Cup champion Manchester United

Wembley Stadium-ah mi-nute 90 chhungin chak zawk an awm lo a, extra time-ah Chris Smalling hnawhchhuah ni mah se Jesse Lingard ball pet kawh lutuk chu player 10-a khel Manchester United chak nan a tawk. Kum 2004 hnua a vawi khat nan Louis van Gaal hoin Red Devils-in FA Cup nomawi chawi mah se Dutch manager hian a hna a hum zo lo.

Inrinni zan inkhelah hian substitute Jason Puncheon chuan minute 12 chiah a awm tawh tihin Crystal Palace tan a khung a, minute thum hnuah United-in Juan Mata hmangin an sut. Extra time khelh a ni a, United tana substitute Lingard-a'n goal khung hun hi minute 110-na a ni.

UCL Referee?

Champions League final-a Real Madrid leh Atletico Madrid intawn huna referee tur chu Mark Clattenburg a ni a, FA Cup final hamtu a ni bawk.

English referee hian Palace striker Connor Wickham-a'n United defender Smalling a tlan pelh hnuah foul a ham a, wing back Joel Ward-a'n Argentine defender Marcos Rojo a paltlang hnuah inkhel a titawp bawk. Clattenburg hian foul ham loin inkhel tlang pui zawk se Eagles hi an lawm zawk ang a, Wickham phei chuan a ti goal thei hial ang.

A lan dan ber chuan Clattenburg hian a hrem tur zawk United hrem loin Palace a hrem zawkah a ngaih theih a, thutlukna chhe tak a ni.

Puncheon Punch

Minute 72-naah Marcus Rashford chu Johan Cabaye-a'n a rah palh vakin thlak a ngai a, English striker hi inhliam vangin Ashley Young-a'n a rawn thlak. Hemi rual chiah hian French midfielder hi Puncheon-a'n a rawn thlak a, hei erawh tactical change a ni thung.

Alan Pardew-a substitution siamin awmzia a nei a, Puncheon-a corner a pet chu United-in clear mah se Palace lamin ball an vawrh luh thut avangin offside trap bumtu Puncheon chuan goal khung-na hun ṭha a nei a, keeper ṭha David de Gea a insiam rem hman lo a, chiang zetin minute 78-naah a pet goal.

Comeback chu

Puncheon-a goal vang hian United hi chak lo se vanduai tiha chhiar theih an ni ang, a chhan chu Marouane Fellaini leh Antony Martial te'n woodwork an tauh per ve ve bakah first half thununtu an ni.

Goal an phur hnuah Wayne Rooney-a'n captain mawh-phurna rawn hlenin ṭha takin ball a khalh lut a, a cross ball ṭha tak chu Fellaini-a'n Mata tan siam sakin Spanish midfielder hian goal-ah a chantir. Vanduai ni thei tur kha an tho chhuah leh takah chuan vannei an ni leh lawi si.

Extra time-ah ṭu lo takin Smalling-a'n yellow card vawi hnihna a hmu a, chak thei tura rin United chu rinkai lo zawk an ni chho nghal. Minute 110-naah Palace defender Damien Delaney clear ṭhat tawk loh chu Lingard-a'n kawh zetin a pet a, net a puar pawp. Nomawi chawi puina tura atan goal duhthusam a nih ang chiahin Lingard-a goal hi United chak nan a tawk.

Pa Vanduai Pardew

Goal khatna a luh chiahin Palace manager Alan Pardew chu mawi takin a lam a, 1990 FA Cup final-a player a nih laia a hneh tawh loh United a hneh thei dawna a lan avangin a lawm hle. Amaherawhchu FA Cup-ah a vawi thum nan Pardew a vanduai a, 2006 final-ah West Ham enkawlin Liverpool chu penalty shootout-ah a hneh lo a, tun ṭumah extra time-ah United a hneh lo leh bawk.

Kum 54-a upa Pardew chuan, "Ka player-te khan an theihna zawng zawngin an khel a, chak pawh an phuin ka hria, amaherawhchu football kalhmang chu a dang. Inkhel thlak danglam thei referee thutlukna kan duh dana kal lo a awm a, chutihrualin team pahnih kan khelh ṭhat avangin final ropui tak a ni. Kan champion zo lo hi pawi kan ti a, kan rilru na mah se tunah chuan season thar kan thlir tawh ang," tiin referee thutlukna dik tawk lo lai a sawi lang.

Ram paliah nomawi

Manchester United manager Louis van Gaal chuan, "Kan champion hi club, fan leh ka tan a pawimawh a ni. Ram paliah cup ka chawi ta a, manager tam tak tih theih loh a ni. Thawhlehni khan Bournemouth kan khel a, tunah player 10-in kan khel leh bawk. A tawp thlengin champion tumin theihtawp kan chhuah a, chu chu kan champion-na chhan a ni," tiin a sawi.

Dutch manager hian Nether-lands, Spain, Germany leh Eng-land-ah club a kaihruai tawh a, nomawi chawi loin a club enkawlte hi a chhuahsan lo.

Manchester United-in kum 12 hnua FA Cup nomawi an chawi leh takah chuan Arsenal record nih rualin vawi 12 an champion ta a, Premier League pasarihna West Ham-in Europa League an khelh phah bawk.