Coppa Italia Milan hnehin Juventus an champion

Pathianni zan Coppa Italia inkhelah history-in bung thar a kai a, Juventus chuan season hnih chhung a zawna Serie A leh Italian Cup nomawi chawi thei hmasa ber ni turin AC Milan chu 1-0 in an hneh.

AC Milan president Silvio Berlusconi-a'n Coppa Italia final khelh a nih hmain Milan player-te chu tun ang renga an khel a nih chuan hlawh a pek loh tur thu a hrilh a, an hlawh la tur chuan court-ah an inhmuh mai a ṭul tur thu a sawi!

Pathianni zanah Milan player-ten hlawh lak loh an duh lo tih khelmual chhungah lantirin theihtawp an chhuah a, khel ṭha zawk mah se a pawimawh ber goal an khung theih miau loh avangin goal awm loin minute 90 chhung an inkhel.

Extra time khelh a ni a, minute 110 thleng goal a lut lo. Mahse, penalty an pet tawh mai dawn nia a lan hnuah Juventus tan Alvaro Morata a inlar a, kum 23-a upa striker hian Juan Cuadrado ball cross chu half volley-in goal-ah a chantir a, Italian Cup-ah Juventus an champion.

Milan an ral

Tun season Serie A-ah Milan-in pasarihna nichungin season an khar a, season tharah Europe-ah an inlan dawn lo. Milan chung chiaha awm parukna Sassuolo chuan Europa League hi an khel dawn a, an club chanchina Europe-a an inlan vawi khatna tur a ni.

Milan-in nomawi an chawi hnuhnung ber chu kum 2011 khan a ni tawh a, Super Cup final-ah Inter Milan chu tuna Juventus boss Massimiliano Allegri kaihhruaina hnuaiah an hneh - January 2014-ah Allegri an ban a, thla ruk hnuah Juventus panin amah bantu lakah Italian coach hian zahngaihna a lantir lo.

Mario khawiah nge?

Extra time-ah Milan tan Mario Balotelli chu khelmual chhungah a tlan lut a, goal an chhuah hnua tlan lut Italian striker hian inkhel thlak danglam turin hun a nei tam tawk lo.

Kum 25-a upa striker hian August, 2014 khan beiseina sang tak nen pound maktaduai 16-in Milan aṭangin Liverpool a zawm a, Reds tan match 28 a inlanah goal li chiah a khung avangin a club hlui Milan lamah hian loan-a chhuahtir leh a ni.

Mahse, Manchester City stri-ker hlui hian a club hlui lamah pawh a thiamna neih ṭhin a chhar tawh lo. Tun season-a vawi 23 a inlanah goal thum chiah a khung a, Milan hian an chelh a rinawm loh!

Hman lawka Europe-a striker langsar ber pawl hian duhtu a hmu meuh tawh lo a, tun hnaia Balotelli lakluh an duh thu sawitu chu Serie A kai thar Crotone an ni a, club president Raffaele Vrenna chuan an hmatawng tih hriam nan Italian striker hi an duh thu a sawi.